Гістарычны візіт Пантыфіка на славутую італьянскую кінастудыю
Аляксандр Амяльчэня - Vatican News
Як паведамляе інфармацыйная служба творчай майстэрні, гэта будзе першы візіт Пантыфіка на легендарную кінастудыю за ўвесь час яе існавання.
"Як толькі мы даведаліся пра магчымасць арганізаваць тое, што ўвойдзе ў гісторыю як першы візіт Пантыфіка ў Чынэчыта, Міністэрства ў супрацоўніцтве са студыяй пачало з вялікім энтузіязмам працаваць над арганізацыяй сустрэчы Святога Айца з акцёрамі і супрацоўнікамі студыі", - падкрэсліла дзяржаўны сакратар па пытаннях культуры Лючыя Баргандзоні.
"Для Чынэчыта вялікі гонар упершыню прымаць візіт Святога Айца, - адзначыла генеральны дырэктар студыі Мануэла Качамані. - Тое, што гэтая ўрачыстая падзея адбудзецца ў доме італьянскага і міжнароднага кіно, якое славіцца выдатнымі майстрамі, з'яўляецца неверагодным прызнаннем. Мы бясконца ўдзячныя Святому Айцу, чыя прыхільнасць да мастацтва і шчырая любоў да кіно робіць нас яшчэ больш свядомымі нашай місіі".
Візіт Папы Францішка на кінастудыю Чынэчыта адбудзецца ў межах Юбілею Творцаў і Свету Культуры, які пройдзе з 15 па 18 лютага 2025 года. Падчас сустрэчы плануецца дыялог Пантыфіка з прадстаўнікамі кінаіндустрыі і работнікамі студыі.
