ПАПА

Аўтабіяграфія Папы: ад сям'і мігрантаў да Пасада Пятра

У новай аўтабіяграфіі пад назвай Spera Францішак распавядае пра цудоўнае выратаванне сваёй сям'і, роздумы пра значэнне гумару ў жыцці і глыбокія асабістыя перажыванні.

Аляксандр Амяльчэня - Vatican News

Лёс часам залежыць ад нечаканых абставін, і гісторыя сям'і Бергольё – яскравае таму пацвярджэнне. У сваёй новай кнізе Папа апісвае падзею, якая магла назаўсёды змяніць гісторыю яго сям'і і Касцёла: "Мае дзядулі і іх адзіны сын, Марыа, малады чалавек, які стаў маім бацькам, купілі білет на гэтую доўгую пераправу, на карабель, які выплыў з порта ў Генуі 11 кастрычніка 1927 года, накіроўваючыся ў Буэнас-Айрэс".

Сям'я была вымушана адкласці падарожжа з прычыны нерэалізаванай маёмасці. Гэтая затрымка выратавала ім жыццё, бо карабель, на які яны набылі білеты, затануў у дарозе. "Не ўяўляеце, колькі разоў я дзякаваў Боскаму Провіду. Менавіта таму я цяпер тут", - дзеліцца Святы Айцец.

Асаблівае месца ў аўтабіяграфіі займаюць успаміны пра сямейнае жыццё і ролю гумару ў пераадоленні цяжкасцей. "У жыцці маёй сям'і было шмат складаных сітуацый, пакут, слёз, але нават у самыя цяжкія моманты мы адчувалі, што ўсмешка і смех могуць даць энергію, каб вярнуцца на правільны шлях. Перш за ўсё гэтаму нас навучыў тата", - піша Папа.

Францішак падкрэслівае, што гумар – гэта не спроба схавацца ад праблем. "Комік – гэта толькі трагік, убачаны ззаду", - заўважае ён, тлумачачы, што сапраўдны гумар дапамагае захаваць прастору для радасці, каб эфектыўна супрацьстаяць цяжкасцям.

У кнізе ёсць цікавы эпізод пра святога Яна Паўла II, які дэманструе важнасць пачуцця гумару ў касцельным жыцці. Калі адзін з кардыналаў паспрабаваў пакрытыкаваць будучага Папу за яго захапленне спортам, Караль Вайтыла адказаў з характэрнай для яго іроніяй: "А ці ведаеш ты, што ў Польшчы гэтым займаецца не менш за 50 працэнтаў кардыналаў?" - пры тым, што ў краіне тады было ўсяго два кардыналы.

Кранальным з'яўляецца аповед пра першае наведванне турмы, дзе Францішак сустрэўся з сябрам, асуджаным за забойства. "Я бачыў яго праз маленькае акенца як паштовую марку, падзеленую на чатыры часткі, абрамленую цяжкімі жалезнымі дзвярыма. Гэта было жахліва, я быў глыбока ўражаны", - успамінае Папа.

Аўтабіяграфія Spera, напісаная ў супрацоўніцтве з Карла Мусо, раскрывае асобу Папы Францішка як чалавека глыбокай веры, які праз асабісты досвед і выпрабаванні прыйшоў да разумення важнасці надзеі і гумару ў духоўным жыцці. "Іронія з'яўляецца лекамі не толькі для падняцця духу і асвятлення іншых, але і для нас саміх, бо самаіронія – гэта магутны інструмент для пераадолення спакусы нарцысізму", - падсумоўвае Святы Айцец.

Аўтабіяграфія Папы выйдзе 14 студзеня 2025 года ў розных краінах свету. У артыкуле выкарыстаны ўрыўкі, апублікаваныя 12 студзеня 2025 года ў італьянскіх выданнях La Stampa, Avvenire, Il Messaggero і Il Giorno.