Ватыканскія СМІ: трансляцыі на дзвюх новых мовах жэстаў

Медыя Святога Пасаду павялічваюць колькасць моваў жэстаў, на якіх вядуцца анлайн-трансляцыі агульных аўдыенцый і малітвы "Анёл Панскі". Да ўжо існуючых італьянскай і амерыканскай, дадаюцца французская і іспанская мовы.

Аляксандр Панчанка - Vatican News

Трансляцыі распачнуцца 26 студзеня 2025 года на адмысловых каналах Vatican News у Youtube. У гэты дзень у Ватыкане Святы Айцец узначаліць урачыстыя цэлебрацыі з нагоды Нядзелі Божага Слова і завяршэння Юбілею свету СМІ.

Ініцыятыва рэалізуецца ў рамках праекту Ніхто не выключаны, мэта якога – данесці слова Папы да людзей з праблемамі слыху. Яна праводзіцца з 2021 года, калі трансляцыі падзей з удзелам Святога Айца пачалі весціся з тлумачэннем на італьянскую і амерыканскую мовы жэстаў. Праект стаў магчымы дзякуючы фінансавай падтрымцы амерыканскага дабрачыннага фонда Conrad N. Hilton Foundation.

Дыкастэрыя па камунікацыі выпусціла таксама мабільны дадатак Vatican for All, які дае магчымасць людзям з сэнсарнымі парушэннямі атрымліваць інфармацыю аб дзейнасці Папы і жыцці Касцёла.