Папа заклікаў да глабальнага перамір'я на свята Божага Нараджэння

Спыніць ваенныя дзеянні на ўсіх франтах заклікаў Францішак пасля традыцыйнай малітвы Анёл Панскі, якая прайшла ў Ватыкане 8 снежня 2024 года, ва ўрачыстасць Беззаганнага Зачацця Найсвяцейшай Панны Марыі.

Марыя Валодзіна - Vatican News

Папа заклікаў вернікаў далучыцца да малітвы за Касцёл і народ Нікарагуа, у свята Беззаганнай заступніцы гэтай краіны. "Хай Нябесная Маці суцешыць іх у цяжкасцях і няўпэўненасці і адкрые сэрцы ўсіх, каб заўсёды шукаць шлях паважлівага і канструктыўнага дыялогу з мэтай садзейнічання міру, братэрству і гармоніі ў краіне", - сказаў Францішак.

Святы Айцец звярнуўся да кіраўнікоў дзяржаў і міжнароднай супольнасці з заклікам спыніць ваенныя дзеянні на ўсіх франтах і гарантаваць перамір'е на свята Божага Нараджэння. Ён пералічыў краіны, дзе ідуць войны: Украіна, Сірыя, Палесціна, Ізраіль, Ліван, М'янма і Паўднёвы Судан.

Пантыфік выказаў глыбокую заклапочанасць становішчам зняволеных, якія чакаюць смяротнага пакарання ў ЗША. Ён заклікаў змяніць прысуды і выратаваць іх ад смерці.

Папа таксама выказаў салідарнасць з працоўнымі з італьянскіх гарадоў Сіена, Фабрыяна і Аскалі-Пічэна, якія рызыкуюць згубіць працоўныя месцы. "Права на працу – гэта права на годнасць!" - падкрэсліў ён.