Святы Айцец заклікаў Каталіцкую акцыю да інтэграцыі мігрантаў

Францішак заклікаў італьянскую Каталіцкую акцыю (АКІ) не зачыняць дзверы перад мігрантамі. Ён падкрэсліў, што Бог асаблівым чынам любіць мігрантаў і клапоціцца пра іх.

Аляксандр Амяльчэня - Vatican News

Папа скіраваў кароткі відэазварот да ўдзельнікаў нацыянальнага з'езду старшынь і дыяцэзіяльных асістэнтаў гэтага каталіцкага руху, які завяршыўся 20 кастрычніка 2024 года ў Сакрафана, непадалёк ад Рыма.

"Мігранта трэба прыняць, суправадзіць, падтрымаць і інтэграваць. У яго руках будзе рост усіх", - лічыць Пантыфік. Ён звярнуў увагу на тое, што загад Езуса "дайце ім есці" датычыць кожнага. Гэта заклік працягнуць руку дапамогі, каб суправаджаць людзей і не даць ім патануць, асабліва гэта тычыцца мігрантаў.

Святы Айцец нагадаў, што ў Старым Запавеце пастаянна згадваюцца тры катэгорыі патрабуючых: удовы, хворыя і мігранты. "Бог асабліва любіць мігрантаў і клапоціцца пра іх", - падкрэсліў ён.

У сваім звароце да Каталіцкай акцыі Францішак падкрэслівае важнасць хрысціянскай салідарнасці і міласэрнасці ў сучасным свеце. Ён заклікае вернікаў не толькі да матэрыяльнай дапамогі, але і да духоўнай падтрымкі і сапраўднай інтэграцыі мігрантаў у грамадства.