Пантыфік: Ян Павел ІІ прыцягвае да Хрыста сваім ладам жыцця

Ян Глінскі

Паводле Францішка, святога Яна Паўла ІІ немагчыма пазнаць ва ўсёй паўнаце без пазнання Караля Вайтылы. “Трэба адкрыць яго асобу, справу, дзейнасць і навучанне як чалавека, святара, біскупа і кардынала, а таксама яго асаблівыя адносіны з моладдзю, яго бацькоўскае стаўленне да іх, а таксама драму яго жыцця, у якім ён страціў па чарзе ўсіх членаў сваёй сям’і”, - напісаў Пантыфік.

“Дадзены зборнік дазваляе нам акунуцца ў багацце чалавечых, душпастырскіх, тэалагічных і культурных талентаў аднаго з самых выдатных людзей мінулага стагоддзя. Святы Ян Павел ІІ па-ранейшаму застаецца крыніцай натхнення і прыцягвае людзей да Хрыста сваім стылем жыцця, глыбінёю навучання, а таксама здольнасцю быць блізкім да кожнага чалавека. У сённяшнім свеце, поўным трывог і непрадказальнасці, нам асабліва патрэбныя яго прыклад і бацькоўства”, - заўважыў у прадмове Папа.

Францішак выказаў надзею, што “старанна падабраныя” думкі Караля Вайтылы будуць спадарожнічаць чытачам кнігі кожны дзень на працягу года, і гэта прынясе багатыя плады дабра.

Кніга Мэтай з’яўляецца шчасце апублікавана італьянскім выдавецтвам Ares у супрацоўніцтве з Люблінскім каталіцкім універсітэтам (KUL). Тэксты згрупаваныя па тэмах: чалавек, сужэнства і сям’я, жыццё ў грамадстве, Касцёл і хрысціянства. Тэксты адабрала і пераклала на італьянскую мову ватыканістка Марына Олма.

Як напісаў ва ўступе да кнігі прафесар Люблінскага каталіцкага ўніверсітэта ксёндз Міраслаў Каліноўскі, святар прафесар Вайтыла быў настаўнікам, які не навязваў свайго бачання і паважаў меркаванне іншых. Апублікаваныя разважанні адлюстроўваюць яго стаўленне да студэнтаў, да якіх ён быў блізкі як “настаўнік, духоўны айцец або спадарожнік падчас выездаў”.