Папа прызначыў асэсара па справах кансэкраванага жыцця
Аляксандр Амяльчэня - Vatican News
Даніэле Лібаноры нарадзіўся 27 мая 1953 года ў Астэлата ў італьянскай правінцыі Ферара. Атрымаў ліцэнцыят па тэалогіі евангелізацыі і доктарскую ступень па тэалогіі хрысціянскага жыцця. 11 чэрвеня 1977 года стаў святаром у архідыяцэзіі Ферара. Працаваў у парафіяльным душпастырстве, а ў 1982-1991 гадах быў рэктарам архідыяцэзіяльнай семінарыі Ферара-Камачыа.
26 снежня 1991 года ксёндз Лібаноры ўступіў у Таварыства Езуса, дзе 18 кастрычніка 2002 года склаў вечныя абяцанні езуіта. Ён служыў універсітэцкім капеланам у Аквіле ў 1993-1997 гадах, а затым правёў год у езуіцкай супольнасці ў Неапалі. Служыў акадэмічным капеланам у рымскім універсітэце Сапіенца з 1998 па 2003 год. Затым да 2016 года быў рэктарам рымскага касцёла Іль Джэзу, а з 2017 года рэктарам касцёла Сан-Джузэпэ-Фаленьямэ.
23 лістапада 2017 года Францішак прызначыў Лібаноры дапаможным біскупам Рымскай дыяцэзіі. З мая 2019 года ён быў дыяцэзіяльным дэлегатам па справах духавенства і семінарый. У красавіку 2018 года стаў чальцом Кангрэгацыі па справах кананізацыі. Біскуп Лібаноры быў вядомым у Рыме экзарцыстам.
Падчас пандэміі COVID-19 у 2020 годзе ён актыўна выказваўся супраць закрыцця ўсіх касцёлаў Рыма.
Трэба заўважыць, што згодна з Апостальскай канстытуцыяй Praedicate Evangelium, жыццём і дзейнасцю манаскіх структур ва ўсім Лацінскім Касцёле кіруе Дыкастэрыя па справах інстытутаў кансэкраванага жыцця і таварыстваў апостальскага жыцця, якую ўзначальвае з 2011 года 76-гадовы бразільскі кардынал Жаао Браз дэ Авіз.
