Святы Айцец да пілігрымаў: едзьце на СДМ з радасцю і ўсе разам

Смела адправіцца ў сумеснае падарожжа, напоўненае радасцю, - з такім пажаданнем звярнуўся Францішак да групы італьянскіх удзельнікаў Сусветных дзён моладзі ў кароткім відэазвароце.

Марыя Валодзіна - Vatican News

Італьянская каталіцкая газета Avvenire апублікавала відэазварот Пантыфіка да маладых італьянцаў, якія 1-6 жніўня 2023 года прымуць удзел у Сусветных днях моладзі ў Лісабоне.

"Жыццё – гэта падарожжа, а пакліканне моладзі ў тым, каб здзяйсняць падарожжы", - заахвоціў маладых пілігрымаў Святы Айцец.

Францішак заклікаў удзельнікаў моладзевага форума “накіраваць погляд да месца прызначэння” і радасна адправіцца туды разам з іншымі. Смела імкнуцца наперад, заўсёды глядзець у напрамку сваёй мэты, рабіць гэта “з містыцызмам падарожжа”, заўсёды “разам з іншымі і ніколі ў адзіночку”, - пажадаў моладзі Папа.