Францішак даў інтэрв’ю эмірацкаму выданню Al-Ittihad

Аляксандр Амяльчэня - Vatican News

“На маю думку, адзіны спосаб абараніць маладых людзей ад негатыўных меседжаў і ілжывых і выдуманых навін, а таксама ад спакус матэрыялізму, нянавісці і прадузятасці, – не пакідаць іх адных у гэтай бітве, даць ім неабходныя інструменты, такія як свабода, праніклівасць і адказнасць”, - падзяліўся Папа.

“Наша задача, - дадаў ён, - пераўтварыць рэлігійнае пачуццё ў супрацоўніцтва, у братэрства, у канкрэтныя справы дабра. Сёння нам патрэбны міратворцы, а не вытворцы зброі; сёння нам патрэбны будаўнікі міру, а не распальвальнікі канфліктаў; нам патрэбны пажарныя, а не падпальшчыкі; нам патрэбны прыхільнікі прымірэння, а не людзі, якія пагражаюць знішчэннем”.

Пантыфік асудзіў “усе небяспечныя для жыцця практыкі, такія як генацыд, тэрарыстычныя акты, прымусовае перамяшчэнне, гандаль чалавечымі органамі, аборты і эўтаназія, а таксама палітыку, якая падтрымлівае ўсё гэта”.

“Я адчуваю абурэнне і агіду да такіх жэстаў”, - так Францішак пракаментаваў спаленне кніг Карана, якое адбылося ў Швецыі ў мінулыя дні. “Любую кнігу, якую яе аўтары лічаць святой, трэба шанаваць з павагі да вернікаў, а свабода выказвання ніколі не павінна выкарыстоўвацца ў якасці апраўдання пагарды да іншых, любы дазвол на гэта павінен быць адхілены і асуджаны”, - заявіў Папа ў інтэрв’ю эмірацкаму выданню.