Святы Айцец у Будапешце: будзьце адчыненымі брамамі
Марыя Валодзіна - Vatican News
У сваёй гаміліі Папа адзначыў, што евангельскі ўрывак, які прагучаў падчас цэлебрацыі Імшы, падводзіць вынік місіі Езуса: “Я прыйшоў, каб вы мелі жыццё і мелі ў дастатку” (Ян 10, 10). Так паступае Добры Пастыр: ахвяруе сваім жыццём дзеля сваіх авечак. Як Пастыр, які ідзе на пошукі свайго статка, Езус прыйшоў шукаць нас, калі мы былі страчаныя, як Пастыр, ён прыйшоў, каб пазбавіць нас ад смерці, як Пастыр, які ведае кожную з сваіх авечак і любіць бясконцай пяшчотай, Ён зрабіў нас дзецьмі Айца, - сказаў Папа.
Пантыфік прапанаваў разгледзець больш падрабязна два дзеянні, якія, згодна з Евангеллем, здзяйсняе для сваіх авечак Добры Пастыр: спачатку Ён іх кліча, а потым выводзіць.
Па-першае, “кліча сваіх авечак па імені” (Ян 10, 3). У пачатку нашай гісторыі збаўлення было жаданне Бога дасягнуць нас, Яго клопат пра кожнага з нас, Яго міласэрнасць, якая жаданне выратаваць нас ад граху і смерці, даць нам жыццё ў дастатку і бясконцую радасць. Езус, Добры Пастыр чалавецтва, прыйшоў, каб паклікаць нас і прывесці дадому, у сэрца Айца, - зазначыў Святы Айцец.
Нават сёння, у любой жыццёвай сітуацыі, у нашых стратах, страхах, у пачуцці паразы, у турме смутку, Ён кліча нас. Ён прыходзіць, як Добры Пастыр, і кліча нас па імені, каб расказаць нам, наколькі мы каштоўныя ў Яго вачах, каб вылечыць нашы раны, узяць на сябе нашы слабасці і пазнаёміць з Айцом, - сказаў Папа.
“Браты і сёстры, сёння раніцай мы адчуваем радасць ад таго, што мы – святы народ Божы: усе мы нараджаемся ад Яго паклікання. Менавіта Ён паклікаў нас, і таму мы – Яго народ, Яго статак, Яго Касцёл”, - сказаў Святы Айцец, дадаючы, што, нягледзячы на нашы адрозненні, “веліч Яго любові аб'яднала ўсіх нас у адны абдымкі”.
Прыемна быць разам: біскупам і святарам, кансэкраваным асобам і свецкім вернікам. Прыемна падзяляць гэтую радасць разам з экуменічнымі дэлегацыямі, кіраўнікамі яўрэйскай супольнасці, прадстаўнікамі грамадзянскіх інстытутаў і дыпламатычнага корпуса, - зазначыў Папа, дадаючы, што каталіцызм “інклюзіўны і ніколі не выключае”, таму ўсе пакліканы развіваць адносіны братэрства, супрацоўніцтва і ўзаемнай любові.
Па-другое, паклікаўшы авечак, Пастыр “выводзіць іх" (Ян 10, 3), - нагадаў Пантыфік. Спачатку мы сталі народам Божым, а потым выходзім у свет, каб з мужнасцю і бясстрашнасцю абвяшчаць Добрую навіну, каб стаць сведкамі любові, якая адрадзіла нас. Езус кажа: “Я — брама. Калі хто ўвойдзе праз Мяне, будзе збаўлены, і ўвойдзе, і выйдзе, і знойдзе пашу" (Ян 10, 9). Езус – гэта брама, якая выводзіць нас у свет. Ён падахвочвае нас ісці насустрач братам, - нагадаў Францішак, заклікаючы слухачоў знайсці мужнасць, каб дасягнуць перыферый свету, стаць, як Езус, адчыненай брамай.
“Сумна і балюча бачыць зачыненыя брамы: зачыненыя брамы нашага эгаізму ў адносінах да тых, хто штодзень ходзіць побач з намі, зачыненыя брамы нашага індывідуалізму ў грамадстве, якое рызыкуе атрафіравацца ў адзіноце, зачыненыя брамы нашай абыякавасці да тых, хто жыве ў пакутах і беднасці, брамы, зачыненыя для тых, хто чужы, іншы, мігрант, бедны. І нават зачыненыя брамы нашых касцёльных супольнасцяў”, - адзначыў Святы Айцец, заклікаўшы: “Калі ласка, давайце адчынім брамы!”, каб дазволіць кожнаму ўвайсці і спазнаць прыгажосць любові і прабачэння Пана.
Пантыфік заклікаў пастараў быць адчыненымі брамамі, пасрэднікамі Божай ласкі, экспертамі па блізкасці, гатовымі прапанаваць іншым жыццё і Пана Езуса Хрыстуса. Ён таксама звярнуўся да свецкіх вернікаў, катэхетаў, душпастыраў, тых, хто выконвае палітычныя і сацыяльныя абавязкі, тых, хто проста вядзе паўсядзённы лад жыцця: “Будзьце адчыненымі брамамі”.
“Езус – Добры Пастыр кліча нас па імені і клапоціцца пра нас з бясконцай пяшчотай. Ён – брама, і той, хто ўваходзіць праз гэтую браму, мае вечнае жыццё. Такім чынам, Ён – наша будучыня, будучыня "жыцця ў дастатку" (Ян 10,10), - сказаў Святы Айцец, заахвочваючы слухачоў “ніколі не сумаваць”. “Давайце ніколі не дазволім сабе скрасці радасць і спакой, якія Ён даў нам, давайце не зачыняцца ў бедах ці апатыі. Дазволім сабе суправаджаць нашага Пастыра, з ім наша жыццё, нашы сем'і, нашы хрысціянскія супольнасці і Венгрыя ззяюць новым жыццём!” – сказаў Папа.
