Пантыфік заклікаў кіраўнікоў народаў натхняцца Pacem in terris

Папа нагадаў пра актуальнасць энцыклікі Яна ХХІІІ Pacem in terris, выдадзенай 11 красавіка 1963 года. Ён заклікаў усіх прачытаць гэты дакумент, а кіраўнікоў народаў – натхняцца ім у сваім задумах і рашэннях.

Аляксандр Панчанка – Vatican News

“Учора споўнілася 60 гадоў энцыкліцы Pacem in terris, якую святы Ян XXIII скіраваў да Касцёла і свету ў разгар напружання паміж двума супрацьлеглымі блокамі ў так званай халоднай вайне. Папа адкрыў перад усімі шырокі гарызонт, на якім можна гаварыць аб міры і будаваць мір – Божую задуму для свету і чалавечай сям’і”, - сцвердзіў Францішак падчас агульнай аўдыенцыі, якая 12 красавіка 2023 года прайшла ў Ватыкане.

Папа заўважыў, што ў свой час энцыкліка Pacem in terris стала сапраўдным благаслаўленнем, як “пробліск ціхамірнасці сярод цёмных хмар”, а яе пасланне застаецца вельмі актуальным у наш час.

“Дастаткова, напрыклад, гэтага ўрыўку: “Адносіны паміж палітычнымі супольнасцямі, як і адносіны паміж людзьмі, павінны рэгулявацца не сілай зброі, але святлом розуму, гэта значыць праўдай, справядлівасцю і дзейснай салідарнасцю” (62), - нагадаў Пантыфік.

“Я запрашаю вернікаў, а таксама мужчын і жанчын добрай волі, чытаць Pacem in terris, і малюся, каб кіраўнікі народаў натхняліся ёй у сваіх планах і рашэннях”, - падкрэсліў Святы Айцец.

Завяршаючы агульную аўдыенцыю, Францішак прывітаў вернікаў з розных краін свету, сабраных на плошчы святога Пятра ў Ватыкане, у чарговы раз заклікаючы ўсіх маліцца за змучаную вайной Украіну.