ПАПА

Святы Айцец да літургістаў пра дух сапраўднай традыцыі

Літургія – гэта справа Хрыста і Касцёла, яна з’яўляецца жывым арганізмам, - звярнуў увагу Папа 1 верасня 2022 года, сустракаючыся з прадстаўнікамі Асацыяцыі выкладчыкаў і экспертаў у літургіі.

Аляксандр Амяльчэня - Vatican News

Працэс літургічнай рэформы працягваецца пастаянна, - адзначыў Францішак. - Ён патрабуе паглыбленага вывучэння, часу, гарачага і цярплівага клопату, духоўнай і душпастырскай разумнасці, фармацыі да “літургічнай мудрасці”, якая не паддаецца імправізацыі і павінна пастаянна ўдасканальвацца.

Літургія – гэта не мармуровы і не бронзавы помнік, не музейная рэч; яна – жывая, як расліна, і яе трэба асцярожна культываваць; яна – радасная, з радасцю Духа Святога, а не свецкага свята, - звярнуў увагу Пантыфік.

Ён папрасіў тэолагаў у сваёй даследчай працы не аддзяляць акадэмічнага вымярэння ад душпастырскага і духоўнага. Папа перакананы, што “сёння нам больш, чым калі-небудзь, патрэбна высокае бачанне літургіі, якое не зводзіцца да рубрыкальных дэталяў: літургія, якая не з'яўляецца свецкай, але прымушае падняць вочы да неба, каб адчуць, што свет і жыццё звязаны з Таямніцай Хрыста; і ў той жа час “прыземленая” літургія, propter homines, недалёкая ад жыцця”.

Падчас аўдыенцыі для прадстаўнікоў Асацыяцыі выкладчыкаў і экспертаў у літургіі

Францішак спаслаўся на свой ліст Desiderio desideravi, дзе падкрэсліў неабходнасць пошуку адпаведных каналаў для вывучэння літургіі, што выходзіць за межы акадэмічнай сферы і дасягае народа Божага.

Ён падкрэсліў важнасць укаранёнасці літургічнай цэлебрацыі ў традыцыі. “Ёсць дух, які не з'яўляецца духам сапраўднай традыцыі: свецкі дух адступлення назад, модны сёння: думаць, што ісці да каранёў азначае вяртацца назад. Не, гэта розныя рэчы. Калі вы ідзяце да каранёў, карані заўсёды падымаюць вас. Як дрэва, якое расце з таго, што ідзе ад сваіх каранёў. Гэта спакуса ў жыцці Касцёла, якая вядзе да свецкага рэстаўрацыянізму, замаскіраванага пад літургію і тэалогію, але свецкага. Нехта казаў, што традыцыя – гэта жывая вера мёртвых, а традыцыяналізм – гэта мёртвая вера некаторых жывых. Яны забіваюць гэты кантакт з каранямі, вяртаючыся назад. Будзьце асцярожныя: сёння існуе спакуса адступлення назад, замаскіраваная пад традыцыю”, - адзначыў Пантыфік.

Францішак пажадаў сваім гасцям, каб вывучэнне літургіі было заўсёды прасякнута малітвай і жывым досведам Касцёла, які цэлебруе.