Пантыфік здзейсніў шэраг важных прызначэнняў у Рымскай курыі

Папа прызначыў кардынала Хасэ Таленціна дэ Мендонсу, былога Архіварыуса і Бібліятэкара Святога Рымскага Касцёла, прэфектам Дыкастэрыі па культуры і адукацыі. Рашэнне агучылі 26 верасня 2022 года.

Аляксандр Амяльчэня - Vatican News

Партугальскі іерарх нарадзіўся на востраве Мадэйра. Вывучаў тэалогію. Прыняў святарскае пасвячэнне ў 1990 годзе. Затым працягваў тэалагічнае навучанне ў Рыме. Стаў выкладчыкам у Партугальскім каталіцкім унівэрсытэце. У 2011 годзе быў прызначаны канцлерам Папскай рады па культуры. З 1 верасня 2018 года – Архіварыус і Бібліятэкар Святога Рымскага Касцёла. 1 верасня 2019 года Францішак абвясціў аб яго ўзвядзенні ў кардынальскую годнасць.

Святы Айцец прызначыў таксама сакратара Дыкастэрыі па культуры і адукацыі. Ім стаў ксёндз Джавані Чэзарэ Пагацы, выкладчык Папскага тэалагічнага інстытута навук аб сужэнстве і сям’і, які носіць імя Яна Паўла ІІ.

Дыкастэрыя па культуры і адукацыі стала спадкаемніцай Папскай рады па культуры і Кангрэгацыі каталіцкай адукацыі, аб зліцці якіх у адну структуру было заяўлена пасля выхаду новай Апостальскай канстытуцыі Praedicate Evangelium.

Францішак прызначыў і наступніка кардынала Хасэ Таленціна дэ Мендонсы. Архіварыусам і Бібліятэкарам Святога Рымскага Касцёла стане арцыбіскуп Анджэла Вінчэнца Дзані, які быў сакратаром былой Кангрэгацыі каталіцкай адукацыі.