Папа падчас св. Імшы ў капліцы сваёй рэзідэнцыі

ПАПА ФРАНЦІШАК

Францішак: дзе ёсць Святы Дух, там – свабода

Дух евангельскай свабоды вядзе да радасці, бо менавіта яе Езус прынёс сваім уваскрасеннем, - падкрэсліў Папа падчас ранішняй св. Імшы, якую 15 мая 2020 г. цэлебраваў у ватыканскім Доме св. Марты.

У гаміліі Пантыфік пракаментаваў літургічнае чытанне з кнігі Дзеяў Апосталаў (15,22-31), у якім распавядаецца як Павел і Барнаба вызвалілі хрысціян язычніцкага паходжання ад абрадавых прадпісанняў, прадугледжаных Законам Майсея.

Святы Айцец заўважыў, што хрысціяне з язычнікаў былі ўсхваляваны, бо некаторыя паплечнікі апосталаў, патрабавалі ад іх спачатку стаць добрымі юдэямі, а толькі потым – хрысціянамі. Яны не разумелі гэтага і не хацелі быць “хрысціянамі другой катэгорыі”.

Былыя юдэі, у сваю чаргу, падмацоўвалі свае пазіцыі “душпастырскімі, тэалагічнымі і нават некаторымі маральным аргументамі”, што ставіла пад пытанне свабоду Святога Духа, бескарыслівасць Уваскрасення Хрыста і Божай ласкі.

Паводле Папы, гэтыя нашчадкі фарысеяў былі суровымі, ідэалагізаванымі, звялі догматы да ўзроўню ідэалогіі, а рэлігію – да прадпісанняў: не пазнаўшы свабоды і радасці Евангелля, адбіралі іх у іншых. Для гэтых людзей дасканаласцю на шляху наследавання Езуса была суровасць, - дадаў ён.

“Дзе ёсць суровасць – там няма Святога Духа, бо Святы Дух – гэта свабода. Гэтыя людзі пазбаўлялі свабоды Святога Духа і бескарыслівасці Адкупленне, якое з’яўляецца дарам”

, - сказаў Францішак.

Папа зазначыў, што хрысціяне з язычнікаў ўзрадаваліся рашэнню апосталаў не накладаць на іх дадатковых цяжараў. Ён патлумачыў, што дух суровасці заўсёды вядзе да хвалявання, а “дух евангельскай свабоды вядзе да радасці, бо менавіта яе Езус прынёс сваім уваскрасеннем”.

“Папросім Пана, каб дапамог нам адрозніваць плёны евангельскай бескарыслівасці ад плёнаў неевангельскай суровасці, каб выбавіў нас ад хваляванняў, уласцівых тым, хто падпарадкоўвае жыццё верай, бессэнсоўным казуістычным прадпісанням. Я маю на ўвазе тыя прадпісанні, што не маюць сэнсу, а не запаведзі. Няхай вызваліць нас ад духу суровасці, што пазбаўляе свабоды”, - закончыў гамілію Святы Айцец.