Кардынал Скола аб рызыцы працэдурнага падыходу да сінадальнасці
Аляксандр Амяльчэня - Vatican News
Крыніцай сінадальнасці заўсёды застаецца камунія, а не бюракратычная працэдура. Пра гэта заявіў арцыбіскуп-эмерыт Міланскі кардынал Анджэла Скола ў інтэрв'ю прэлату Вілі Валантэ, рэктару Дыяцэзіяльнага калегіума ў Брэганцоне. Размова была апублікавана з нагоды выхаду італамоўнага швейцарскага выдання міжнароднага тэалагічнага часопіса "Communio".
Іерарх пацвердзіў існаванне рызыкі ператварэння сінадальнасці ў парламенцкі працэс. Разам з тым ён адзначыў, што сам метад нельга перакрэсліваць, бо ён адлюстроўвае розныя формы жыцця Касцёла і павінен прапанавацца як прывабная і змястоўная ініцыятыва.
"Крыніцай сінадальнасці з'яўляецца камунія: камунія – гэта крынічная вада, якую сінадальны метад мусіць скіроўваць, каб яна прынесла плёны ў будаванні Касцёла камуніі", - сказаў ён.
Кардынал Скола згадаў і пра вытокі міжнароднага часопіса "Communio", заснаванага ў 1972 годзе Гансам Урсам фон Бальтазарам, Анры дэ Любакам і Ёзэфам Ратцынгерам. Ён адзначыў каштоўнасць асабістага сяброўства і інтэлектуальнага дыялогу з гэтымі выдатнымі тэолагамі. Сёння гэты праект пашыраецца на розныя краіны. Новая італамоўная швейцарская рэдакцыя будзе афіцыйна прэзентавана 23 жніўня 2026 года падчас форуму ў Рыміні.
Вопыт выдання, на думку кардынала Сколы, паказвае, што глыбокая тэалагічная рэфлексія здольная служыць Касцёлу без звядзення яго існавання да звычайных структур і працэдур.
Разважаючы пра спадчыну Другога Ватыканскага Сабора і думку Ёзэфа Ратцынгера - Бэнэдыкта XIV, іерарх адзначыў, што сучасны Касцёл перажывае пералом эпох. Менавіта таму неабходна пераадольваць разрыў паміж "я" і "мы", наноў адкрываючы перспектыву Хрыста і касцельнай супольнасці.
Заслужаны іерарх перакананы, сінадальны шлях мае глыбокі сэнс толькі тады, калі ён не зводзіцца да бясконцых камісій і дыскусій, а паўстае з рэальнага духоўнага адзінства.
