Рэлігійныя лідары Італіі падпішуць Дамову аб дыялогу
Аляксандр Амяльчэня - Vatican News
У чацвер, 25 чэрвеня 2026 года, адбудзецца афіцыйнае падпісанне дакумента, які аб'яднае прадстаўнікоў розных рэлігій і веравызнанняў Італіі. Падзея завяршае трохгадовы шлях сумесных сустрэч і кансультацый.
Галоўная мэта пагаднення ў тым, каб надаць пераемнасць і выразную перспектыву сумеснай працы. Рэлігійныя супольнасці імкнуцца ўзмацніць сваю прысутнасць у публічнай прасторы дзеля грамадскай згуртаванасці.
Новы дакумент пакліканы афіцыйна замацаваць вынікі ініцыятывы, якая атрымала назву "Італьянскі шлях дыялогу. Рэлігіі ў публічнай прасторы і дзеля грамадскай згуртаванасці". Яго падпісанне, як лічаць у італьянскім епіскапаце, дазволіць вывесці шматгадовыя намаганні на афіцыйны ўзровень і адкрые новыя магчымасці для суіснавання розных культур.
Пагадненне аб'яднае шырокі спектр рэлігійных традыцый краіны, уключаючы прадстаўнікоў хрысціянскіх канфесій, ісламскіх і юдэйскіх арганізацый. Свае подпісы пад дакументам паставяць таксама кіраўнікі будысцкіх, індуісцкіх, сікхскіх і бахаісцкіх супольнасцей Італіі. Урачысты акт збярэ разам каталіцкіх біскупаў, праваслаўнае і пратэстанцкае духавенства. Сярод удзельнікаў будуць прадстаўнікі найбуйнейшых міжрэлігійных інстытутаў і культурных цэнтраў краіны.
