Нунцый у Анголе пра візіт Папы і пераадоленне галечы
Аляксандр Амяльчэня - Vatican News
Ангола, нягледзячы на свой статус аднаго з найбуйнейшых вытворцаў нафты ў Афрыцы і ключавога пастаўшчыка энергарэсурсаў у Еўропу, працягвае пакутаваць ад глыбокай структурнай галечы і сацыяльных падзелаў.
У інтэрв’ю італьянскай газеце "Avvenire" апостальскі нунцый у Анголе арцыбіскуп Крыспін Дубель падкрэсліў, што Касцёл і ўсё грамадства з нецярпеннем чакаюць прыезду Пантыфіка, бачачы ў гэтым візіце крыніцу надзеі для краіны, якая ўсё яшчэ гоіць раны мінулага.
Паводле слоў ватыканскага дыпламата, Ангола ў 2025 годзе адзначыла пяцідзесяцігоддзе сваёй незалежнасці, аднак гэтая дата таксама нагадвае пра пачатак разбуральнай грамадзянскай вайны, якая доўжылася да 2002 года. Леў XIV стане трэцім Пантыфікам, які наведае гэтую зямлю, пасля Яна Паўла II і Бэнэдыкта XVI. Арцыбіскуп Дубель адзначыў, што малітва разам з Святым Айцом дапаможа ангольцам з большым даверам паглядзець на сваю будучыню і на міжнародную супольнасць.
Нунцый звярнуў увагу на парадокс: з’яўляючыся трэцяй эканомікай Афрыкі на поўдзень ад Сахары, краіна не можа забяспечыць годны ўзровень жыцця для многіх грамадзян. Ёсць неабходнасць у празрыстым кіраванні прыроднымі багаццямі, якія часта становяцца прычынай канфліктаў і злоўжыванняў.
Асобнае месца ў размове заняла тэма экалогіі. Арцыбіскуп пацвердзіў, што змены клімату і безадказнае стаўленне да прыроды непасрэдна ўплываюць на насельніцтва. Ён выказаў упэўненасць, што Леў XIV прапануе новую канцэпцыю развіцця афрыканскага кантынента, заснаваную на хрысціянскай салідарнасці. Біскупы Анголы ў сваю чаргу выступаюць як абаронцы правоў чалавека, асуджаючы карупцыю і патрабуючы адказнасці ад улад.
На заканчэнне прадстаўнік Святога Пасада закрануў праблему распаўсюджвання сект, якія прапануюць "лёгкае" духоўнае жыццё. Тым не менш, каталіцкая ідэнтычнасць у краіне застаецца моцнай. Касцёл імкнецца быць там, дзе людзі маюць патрэбу ў дапамозе, кіруючыся прынцыпам "бачыць, ацэньваць і дзейнічаць", каб праз прабачэнне і міласэрнасць спрыяць сапраўднаму нацыянальнаму прымірэнню.
