Без працэсій, але з малітвай: рашэнне Патрыярха Іерусаліма
Аляксандр Амяльчэня - Vatican News
Сёлетні шлях да ўваскрасення Хрыстовага для хрысціян Святой Зямлі азмрочаны суровай рэчаіснасцю ваенных дзеянняў. Кардынал П’ербатыста Піцабала ў сваім адмысловым звароце да вернікаў са смуткам канстатаваў, што немагчымасць правесці традыцыйныя набажэнствы ў месцах Мукі Збаўцы стала яшчэ адной балючай ранай, нанесенай канфліктам.
Самай значнай стала адмена традыцыйнай працэсіі ў Пальмовую нядзелю, якая звычайна накіроўваецца з Аліўнай гары ў Іерусалім. Замест яе адбудзецца малітва за Горад у пакуль нявызначаным месцы. Як паведаміў Патрыярх, Імша Хрызма таксама адкладзена на нявызначаны тэрмін, пакуль абстаноўка не дазволіць правесці яе бяспечна, што ўжо атрымала афіцыйнае адабрэнне ад Дыкастэрыі Божага культу і дысцыпліны сакрамэнтаў.
Нягледзячы на складанасці, касцёлы дыяцэзіі застаюцца адкрытымі. Кардынал Піцабала заклікаў пробашчаў і святароў рабіць усё магчымае, каб спрыяць удзелу вернікаў у пасхальных набажэнствах у той форме, якую дазваляе бяспека. Ён падкрэсліў, што нават калі супольнасць не можа сабрацца так, як хацелася б, нельга адмаўляцца ад малітвы.
У гэты дзень хрысціянам прапануецца памаліцца на ружанцы аб дары міру і згоды, асабліва за тых, хто пакутуе ад вайны. Спецыяльна для гэтага быў падрыхтаваны малітоўны фармуляр, складзены айцом Франчэска Патонам.
Завяршаючы свой зварот, іерарх нагадаў, што пустая труна Хрыста з’яўляецца сімвалам перамогі жыцця над нянавісцю. Ён выказаў упэўненасць у тым, што ніякая цемра, нават цемра вайны, не можа мець апошняга слова, а надзея павінна падтрымліваць крокі кожнага верніка ў гэтыя выпрабавальныя часы.
