Менш вернікаў, больш адказнасці: вынікі для Касцёла ў Германіі
Аляксандр Амяльчэня - Vatican News
Сучасны рэлігійны ландшафт Германіі працягвае перажываць значную трансфармацыю. Паводле апошніх даных, апублікаваных Канферэнцыяй Каталіцкіх Біскупаў у Боне і Радай Евангелічнай Царквы ў Гановеры, агульная колькасць вернікаў дзвюх найбуйнейшых канфесій краіны скарацілася прыкладна на 3 працэнта.
Як паведамляе епіскапат, Каталіцкі Касцёл у Германіі налічвае каля 19,2 мільёна вернікаў, што на 550 тысяч менш, чым у 2024 годзе – гэта адпавядае спаду амаль на 2,8 працэнта. У сваю чаргу, Евангелічная Царква аб’ядноўвае 17,4 мільёна чалавек, зафіксаваўшы спад на 3,2 працэнта. Такім чынам, агульнае змяншэнне пратэстанцкай супольнасці склала каля 580 тысяч асоб.
Дэталізацыя лічбаў дазваляе ўбачыць больш складаную карціну, чым простае скарачэнне. Хоць колькасць хростаў і касцельных шлюбаў знізілася, паказчыкі Першай Камуніі і Бежмавання дэманструюць трывалую стабільнасць. Больш за тое, назіраецца невялікі рост колькасці тых, хто свядома далучаецца да Каталіцкага Касцёла або вяртаецца ў яго лона пасля перапынку.
Каментуючы гэтыя даныя, старшыня нямецкага епіскапату біскуп Хайнер Вільмер адзначыў, што статыстыка за 2025 год з’яўляецца адлюстраваннем складанай сітуацыі, у якой знаходзіцца Касцёл. Іерарх выказаў удзячнасць душпастырам за іх адданую працу і акцэнтаваў увагу на пазітыўным знаку – невялікім павелічэнні наведвальнасці набажэнстваў. Сёння ў нядзельных Імшах прымаюць удзел у сярэднім 1,3 мільёна католікаў.
Біскуп Вільмер падкрэсліў, што кожны выхад з супольнасці з’яўляецца балючым, бо Касцёл – гэта адзіны арганізм, з’яднаны хростам. Тым не менш, памяншэнне колькасці хрысціян не павінна спыняць сведчанне веры.
Ён таксама выказаў асаблівую ўдзячнасць 600 тысячам валанцёраў, чые намаганні дазваляюць парафіям заставацца жывымі асяродкамі малітвы і дапамогі, нават у часы сацыяльных выклікаў, якія стаяць перад Касцёлам.
