Літургічны мір: аўтарытэтны кардынал заклікаў да адзінства
Аляксандр Амяльчэня - Vatican News
У артыкуле, апублікаваным у блогу “Diakonos”, вядомы гісторык Касцёла і шматгадовы супрацоўнік і кіраўнік у Рымскай курыі кардынал Вальтэр Брандмюлер заклікаў да неадкладнага “перамір’я на літургічным фронце”.
На думку 97-гадовага іерарха, сучасны падзел выкліканы не самой саборнай канстытуцыяй аб літургіі, а спосабамі яе рэалізацыі на практыцы. Канфлікт падаграваецца не столькі догматамі, колькі спрэчкамі вакол літургічных традыцый і форм.
Кардынал Брандмюлер аднолькава крытычна ставіцца як да адвольных літургічных эксперыментаў пасля Другога Ватыканскага Сабора, так і да катэгарычнай адмовы ад любога развіцця з боку прыхільнікаў “традыцыйнай” лацінскай Імшы. Ён нагадвае, што літургічныя формы заўсёды эвалюцыянавалі як на Усходзе, так і на Захадзе, таму ніводная гістарычная форма не можа прэтэндаваць на абсалютную нязменнасць.
Іерарх падкрэслівае: паслясаборная Імша была ўведзена Папам, таму павінна прымацца з паслухмянасцю, нават калі існуе яе абгрунтаваная крытыка. У той жа час эксперыменты, якія парушаюць нормы, пагражаюць не толькі адзінству літургіі, але і самой веры.
Нямецкі пурпурат заклікае “раззброіць” мову літургічных дыскусій, пазбягаць узаемных абвінавачванняў і строга прытрымлівацца ўсталяваных касцельных норм. Да таго часу, пакуль не адбудзецца магчымая “рэформа рэформы”, галоўным прыярытэтам павінна стаць захаванне адзінства праз павагу да існуючых правілаў.
97-гадовы кардынал Вальтэр Брандмюлер застаецца адным з самых аўтарытэтных галасоў у Каталіцкім Касцёле. Яго навуковы досвед як былога старшыні Папскага камітэта гістарычных навук надае асаблівую вагу гэтаму закліку да міру ўнутры каталіцкай супольнасці.
