Сеул 2027: сімвалы СДМ распачынаюць падарожжа па Карэі
Аляксандр Амяльчэня - Vatican News
20 студзеня 2026 года сеульская катэдра напоўнілася асаблівай малітвай: арцыбіскуп Пітэр Сун Тэк Чон благаславіў пятнаццаць скульптур з лагатыпам будучага свята. Кожная з гэтых эмблем адправіцца ў свой рэгіён як вястун адзінства і супольнай мары.
Гэты крок распачаў новы этап падрыхтоўкі пасля вяртання Крыжа СДМ і іконы Маці Божай “Salus Populi Romani” з міжнароднага падарожжа, падчас якога яны пабывалі і ў Рыме на Юбілеі моладзі.
Арцыбіскуп Чон заахвоціў вернікаў рыхтавацца да сустрэчы ўсім сэрцам, каб “Сеул 2027” стаў святам, дзе кожнага госця прымуць як роднага. Гэта вялікае падарожжа па краіне пачалося 21 студзеня 2026 года ў дыяцэзіі Вонджу і будзе доўжыцца да чэрвеня 2027 года, калі ўсе сімвалы зноў збяруцца ў сталіцы.
Падрыхтоўка да сустрэчы ў Сеуле прасякнута глыбокай павагай да прыроды. Сімвалічныя скульптуры-лагатыпы, створаныя па праекце маладога валанцёра Чун Хун Чо, змайстраваны з кардонных панэляў, якія лёгка паддаюцца перапрацоўцы. Такі выбар матэрыялу – гэта не проста дызайнерскае рашэнне, а сведчанне адказнасці за планету, пра што нястомна нагадвае Касцёл.
Гэтыя экалагічныя эмблемы стануць сэрцам шматлікіх сустрэч у гарадах і вёсках па ўсёй Карэі. Мясцовыя вернікі спадзяюцца, што праз малітву і супольную дарогу карэйская моладзь зможа адкрыць свае сэрцы для аднагодкаў з розных кантынентаў, рыхтуючы глебу для сапраўднага свята веры і братэрства.
