Касцёл

Тыдзень у Беларусі – важнае

Дабрачынная акцыя, талака, сустрэча моладзі, рэстаўрацыя святыні – агляд найбольш значных падзей, якія адбыліся ў Каталіцкім касцёле ў Беларусі на гэтым тыдні, падрыхтавала Беларуская рэдакцыя Vatican News. Прапануем вашай увазе самае важнае з жыцця беларускіх католікаў.

Павел Міцкевіч – спецыяльна для Vatican News

У Мінску адбыўся галоўны сход Легіёна Марыі. 29 сакавіка 2025 года ў сталічным касцёле Божага Цела сабраліся легіянеры Марыі, каб бліжэй пазнаёміцца паміж сабой, умацаваць дух адзінства Легіёна. Сустрэча прайшла з удзелам Генеральнага вікарыя архідыяцэзіі біскупа Юрыя Касабуцкага, які цэлебраваў святую Імшу. У гаміліі іерарх запрасіў прасіць у Бога духа, які быў у Марыі, даверыцца Яму і жыць з Ім.

У парафіях Беларусі ладзяць талаку. 5 красавіка 2025 года суботнікі па добраўпарадкаванні храмаў і прылеглых тэрыторый арганізуюць, напрыклад, у парафіі святога Францішка ў Мінску, у касцёле ў Варнянах. Таксама вернікі сабраліся на добраўпарадкаванні тэрыторыі старадаўняга разбуранага касцёла Унебаўзяцця Найсвяцейшай Панны Марыі ў Дубраве Маладзечанскага раёну. Праца па расчыстцы ад хмызняку руінаў гэтай святыні стала чарговай валанцёрскай акцыяй.

Дабрачынную акцыю правялі ў гродзенскай катэдры. 30 сакавіка 2025 года традыцыйную для Вялікага посту акцыю арганізавала таварыства Caritas Гродзенскай дыяцэзіі. Вернікам прапанавалі набыць вырабы, створаныя валанцёрамі таварыства і людзьмі з абмежаванымі магчымасцямі. Сродкі, атрыманыя ад продажу, накіроўваюцца на дапамогу дзецям з абмежаванымі магчымасцямі і тым, хто знаходзіцца ў цяжкай жыццёвай сітуацыі.

Пачынаецца рэстаўрацыя інтэр'ераў касцёла Божага Цела ў Нясвіжы. Будаўнічым праектам прадугледжаны рэстаўрацыя жывапісу малельнай залы гэтай унікальнай святыні канца XVI стагоддзя, вядомай як другі ў свеце і першы ва Усходняй Еўропе касцёл у стылі ранняга барока. Таксама чакаецца рэстаўрацыя алтароў, амбона, прэсбітэрыя, памяшкання сакрыстый, аднаўленне люстраў, спавядальні ды іншыя працы. Агульная працягласць работ складзе пяць з паловай гадоў. Падрыхтоўчыя работы пачаліся ў красавіку 2025 года, рэстаўрацыя павінна завяршыцца да канца 2030 года.

Сустрэча сэрцанскай моладзі прайшла ў Паставах. 28-30 сакавіка 2025 года на працягу трох дзён маладых вернікаў вялі слядамі Слугі Божага Яна Леона Дэона. Моладзь разам са святарамі перажывала набажэнствы, канферэнцыі, святую Імшу, а таксама забавы, гульні, прагляд фільму.

Падрыхтавана паводле catholicminsk.by, grodnensis.by, catholicnews.by і ўласнай інфармацыі.