Біёграф: выздараўленне Францішка як Божы знак для працягу місіі

Ян Глінскі

Біёграф Папы Осцін Айверэй упэўнены, што Францішак не збіраецца ў адстаўку. “Ён успрымае сваё выздараўленне як знак: Бог верыць, што ён як Папа яшчэ мае працу для выканання”, – адзначыў брытанскі журналіст у інтэрв’ю для партугальскага сайта "Observador". У той жа час ён падкрэсліў, што “з фізічнага пункту гледжання пантыфікат цяпер, безумоўна, будзе абмежаваны”. На думку біёграфа, “заключны раздзел гэтага пантыфікату” павінен прынесці “канкрэтны плён”.

Осцін Айверэй падчас размовы ўзгадаў няпростыя рашэнні папярэдніх двух пантыфікаў: “Ян Павел II застаўся на пасадзе нягледзячы на тое, што на практыцы не мог кіраваць. Бэнэдыкт XVI сышоў у адстаўку, таму што быў слабы, але потым пражыў яшчэ дзесяць гадоў. Францішак, з іншага боку, хоча выконваць абавязкі Папы столькі, колькі будзе ментальна на гэта здольны”.

Узгадваючы тыдні крытычнага стану Францішка, Айверэй прызнаўся, што адчуў тады “канклаўную ліхаманку”, калі многія ўжо задумваліся пра наступніка. “Сапраўды, здавалася, што мы яго страцім”, – сказаў журналіст, які адмыслова прыехаў у Рым, калі Святы Айцец трапіў у шпіталь.

Па словах брытанскага біёграфа, за час пантыфікату Францішка “культура Ватыкана” набыла характар “служэння паўсюднаму Касцёлу”. Ватыкан перастаў быць сядзібай міжнароднай карпарацыі.

Папа таксама рэфармаваў Калегію кардыналаў. Жаданнем Францішка было забяспечыць прысутнасць “розных рэалій свету” на канклаве, дзе абмяркоўваецца профіль наступнага Папы. “Прысутнасць еўрапейскіх кардыналаў і кардыналаў з Курыі на гэтым канклаве будзе значна меншай, чым на папярэдніх канклавах”, – патлумачыў Осцін Айверэй. У інтэрв’ю журналіст дазволіў сабе паразважаць на тэму профілю магчымага пераемніка Францішка. На яго думку, гэта будзе найперш душпастыр, які “знаходзіцца ў кантакце з рэчаіснасцю і пакутамі гэтага свету”.