Спадчына ўсяго Касцёла: 25-годдзе беатыфікацыі назарэтанак з Навагрудка
Аляксандр Панчанка - Vatican News
“Вы – спадчына ўсяго Хрыстовага Касцёла на ўсе часы”, - казаў пра навагрудскіх мучаніц Папа Ян Павел ІІ падчас беатыфікацыйнай Імшы, якую цэлебраваў 5 сакавіка 2000 года на ватыканскай Плошчы Святога Пятра. Пантыфік асаблівым чынам адзначаў каштоўнасць сведчання любові законніц, іх прыклад хрысціянскага гераізму і давер да сілы Святога Духа.
Назарэтанкі распачалі сваё служэнне ў Навагрудку ў 1929 годзе. Яны займаліся працай з дзецьмі і моладдзю, заснавалі пачатковую школу, дапамагалі ў душпастырскай дзейнасці і рупіліся пра новыя пакліканні. З пачаткам Другой сусветнай вайны іх кляштар і школа былі адабраны, але законніцы не пакінулі горад і працягвалі служыць Богу і людзям, жывучы ў сем’ях і сустракаючыся каля касцёла.
У ліпені 1943 года манахіні прыйшлі ў аддзяленне гестапа, каб ахвяраваць сваё жыццё замест 120 мясцовых жыхароў, асуджаных на расстрэл. У выніку нацысты замянілі смяротнае пакаранне гэтым людзям на прымусовыя працы ў Германіі і ўсе яны перажылі вайну. 31 ліпеня навагрудскія назарэтанкі былі арыштаваны. Гітлераўцы ўсю ноч утрымлівалі манахінь у вязніцы, а раніцай вывезлі ў лес і расстралялі.
Беатыфікацыя законніц адбылася падчас Юбілейнага 2000 года. У гаміліі святы Ян Павел ІІ падкрэсліў, што Бог быў сапраўднай падтрымкай і сілай для навагрудскіх мучаніц – “падтрымкай на працягу ўсяго жыцця, а асабліва ў хвіліны страшнага выпрабавання, калі яны ўсю ноч чакалі смерці, потым – па дарозе да месца экзекуцыі і, нарэшце, у момант расстрэлу”.
“Адкуль яны ўзялі сілы ахвяраваць сабой дзеля ратавання жыцця арыштаваных жыхароў Навагрудка? Адкуль яны ўзялі мужнасць спакойна прыняць такі жорсткі і несправядлівы смяротны прысуд? Бог паступова рыхтаваў іх да гэтага моманту вялікага выпрабавання. Зерне ласкі, кінутае ў глебу іх сэрцаў у момант хросту і затым узрошчанае з вялікім клопатам і адказнасцю, добра прыжылося і прынесла самы цудоўны плод – дар іх жыцця. Хрыстус сказаў: “Ніхто не мае большай любові за тую, калі хто жыццё сваё аддае за сяброў сваіх”. Так, няма большай любові, чым калі хто аддае жыццё за сваіх братоў”, - падкрэсліваў Пантыфік падчас беатыфікацыйнай Імшы.
“Мы дзякуем вам, благаслаўлёныя навагрудскія мучаніцы, за гэта сведчанне любові, прыклад хрысціянскага гераізму і даверу да сілы Святога Духа. “Хрыстус выбраў вас і прызначыў, каб вы ішлі і прыносілі плён, і каб плён ваш трываў” (пар. Ян 15,16). Вы – самая каштоўная спадчына Кангрэгацыі Сясцёр Святой Сям’і з Назарэта. Вы – спадчына ўсяго Хрыстовага Касцёла на ўсе часы”, - казаў Папа.
