Дамінікане Еўропы заклікаюць да міру і раззбраення

Прадстаўнікі дамініканскіх правінцый Еўропы выступілі з заклікам супраць вайны і гонкі ўзбраенняў, заклікаючы да падтрымкі глабальных мірных ініцыятыў.

Аляксандр Амяльчэня - Vatican News

Дамінікане выступілі з моцным заклікам супраць вайны і гонкі ўзбраенняў, заклікаючы да міру і справядлівасці. У сумеснай заяве, падпісанай прамотарамі справядлівасці і міру Ордэна, гучыць глыбокая занепакоенасць глабальнымі канфліктамі і войнамі.

Манахі рашуча асуджаюць вайну ва Украіне, называючы яе "несправядлівым і злачынным актам", і рэзка крытыкуюць агрэсію Расійскай Федэрацыі. Аднак яны таксама падкрэсліваюць неабходнасць для Еўропы ў ваенны час рабіць стаўку на дыпламатыю і перамовы, а не на ваенную эскалацыю.

"Мы не можам дазволіць, каб пастаянны стан вайны стаў новай нормай. Вайна – гэта не проста паражэнне чалавецтва, але і крыніца, якая жывіць нацыяналізм і аўтарытарызм", - падкрэсліваецца ў звароце. Замест гэтага дамінікане заклікаюць да яснага адыходу ад інвестыцый ва ўзбраенне на карысць глабальных ініцыятыў па барацьбе з голадам, падтрымцы адукацыі і вырашэнні праблемы змены клімату.

Падпісанты звяртаюцца да Еўропы з заклікам умацоўваць міжнароднае права і садзейнічаць шматбаковым перамовам. Яны прапануюць правесці новую "Хельсінкскую канферэнцыю" для стварэння агульнай сістэмы бяспекі ў Еўропе, заснаванай на раззбраенні, абароне правоў чалавека і праве на мір.

У заяве таксама падкрэсліваецца, што прыйшоў час умацаваць Арганізацыю Аб'яднаных Нацый і пацвердзіць яе прынцыпы. Еўропа павінна ўзяць на сябе адказнасць за садзейнічанне міру і справядлівасці ва ўсім свеце.