Яго слабасць – наша сіла: Буэнас-Айрэс моліцца за Францішка
Аляксандр Амяльчэня - Vatican News
Мітрапаліт аргенцінскай сталіцы, арцыбіскуп Хорхэ Гарсія Куэрва, узняў свой голас у малітоўным закліку, просячы нябёсы падарыць Пантыфіку новы глыток жыццядайнага паветра. У набажэнстве прынялі ўдзел шматлікія іерархі і святары.
"У гэты момант, калі фізічная нямогласць закранула нашага Святога Айца, мы збіраемся ў адзінай малітве за яго ацаленне," - прамовіў арцыбіскуп Буэнас-Айрэса, звяртаючыся да сабраных вернікаў з гаміліяй.
"Парадаксальным чынам, менавіта ў гэтай слабасці ён дае нам магчымасць знайсці ўласную сілу. І сёння, узносячы нашы малітвы да нябёсаў, мы таксама схіляем галовы ў пакаянні за тыя выпадкі, калі мы дазвалялі сабе пагарджаць ім, кідаць абвінавачванні ў яго бок ці зневажаць яго годнасць. А ў адказ ён заўсёды працягваў нам руку, прасякнутую евангельскай міласэрнасцю, не ведаючы меж," - падкрэсліў іерарх, калі цэлебраваў Імшу, якая аб'яднала вернікаў у малітве за Пантыфіка.
На Плошчы Канстытуцыі 24 лютага 2025 года, акрамя шматлікіх прадстаўнікоў духавенства, сабраліся дзеячы палітычных колаў, лідары грамадскіх рухаў і арганізацый з народных кварталаў, а таксама сотні звычайных вернікаў, якія прыйшлі засведчыць сваю малітоўную падтрымку Папу Францішку.
