Юбілей-2025: новая зона для пілігрымаў з інваліднасцю ў Рыме
Аляксандр Амяльчэня - Vatican News
22 студзеня 2025 года генеральны вікарый Рымскай дыяцэзіі, кардынал Бальдасарэ Рэйна ўзначаліў інаўгурацыю новай прасторы гасціннасці для людзей з інваліднасцю. Ініцыятыва рэалізавана таварыствам Кола Святога Пятра (Circolo San Pietro), якое займаецца дапамогай патрабуючым.
Новая прастора размешчана ў араторыі святога Філіпа Нэры пры базіліцы святога Яна Хрысціцеля Фларэнтыйцаў, непадалёк ад моста Віктара Эмануіла II, які вядзе з цэнтра Рыма ў Ватыкан. Дзякуючы намаганням 70 валанцёраў, цэнтр будзе працаваць па серадах (у дні агульных аўдыенцый Папы), а таксама па суботах і нядзелях падчас юбілейных падзей з 12.00 да 17.00.
Памяшканні цалкам адаптаваныя для людзей з інваліднасцю: усталяваны ліфт і крэсла-пад'ёмнік, інфармацыйныя таблічкі са шрыфтам Брайля, гукавыя дапаможнікі і іншыя прылады для невідушчых і людзей з праблемамі слыху.
У цэнтры ёсць месца захоўвання багажу, пазычальня гульняў, зона адпачынку з асобнымі крэсламі, куток з магчымасцю падагрэць напоі і ежу, памяшканне для прыёму ежы і прагляду тэлебачання, а таксама санітарныя вузлы.
Падрабязную інфармацыю можна атрымаць на сайце spazioaccoglienzacsp.it або па тэлефоне +39 342 677 9660.
