Экуменічны дыялог у Празе: важная сустрэча з кардыналам Кохам

У Празе кардынал Курт Кох, прэфект Дыкастэрыі спрыяння хрысціянскаму адзінству, падкрэсліў значэнне веры як фундамента экуменічнага дыялогу.

Аляксандр Амяльчэня - Vatican News

Экуменічнае набажэнства адбылося 8 студзеня 2025 года ў касцёле святой Уршулі ў Празе пад старшынствам арцыбіскупа Яна Граўбнера, старшыні Канферэнцыі Біскупаў Чэхіі, і біскупа Томаша Тырліка, старшыні Чэшскай Экуменічнай Рады. На набажэнстве прысутнічалі біскупы Чэхіі і Маравіі, прадстаўнікі Экуменічнай Рады Цэркваў і іншыя госці.

Адзінства паміж хрысціянамі можна знайсці толькі ў супольнай веры

"Адзінства паміж хрысціянамі можна знайсці толькі ў супольнай веры. Адзінства абапіраецца на апостальскую веру, якая перадаецца кожнаму новаму члену цела Хрыстовага ў сакраманце хросту", - падкрэсліў кардынал Кох у сваім казанні, адзначыўшы значэнне Нікейскага Сабора, 1700-годдзе якога адзначаецца ў 2025 годзе.

Экуменізм – гэта ўдзел у архісвятарскай малітве Хрыста

Ватыканскі іерарх асабліва падкрэсліў ролю малітвы ў экуменічных намаганнях: "Малітва аб адзінстве хрысціян выяўляе перакананне, што мы, людзі, не можам самі стварыць адзінства. Мы можам толькі дазволіць Духу Святому адарыць нас адзінствам. Экуменізм не з'яўляецца выключна чалавечай справай, але ўдзелам у архісвятарскай малітве Хрыста".

Пасля набажэнства адбылася нефармальная сустрэча кардынала Коха з біскупамі Чэхіі, Маравіі і Сілезіі, а таксама прадстаўнікамі Экуменічнай Рады Цэркваў. Удзельнікі абмеркавалі пытанні экуменізму, адзінства хрысціян, евангелізацыі і спосабаў перадачы веры наступным пакаленням.