Касцёл у ЗША выплаціў $5 млрд ахвярам сексуальных злоўжыванняў
Аляксандр Амяльчэня - Vatican News
Маштабнае даследаванне, праведзенае Цэнтрам даследаванняў апостальскай дзейнасці пры Джорджтаўнскім універсітэце (CARA), выявіла дакладныя лічбы выплат, зробленых Каталіцкім Касцёлам у ЗША. Апытанне ахапіла каля 200 дыяцэзій і эпархій, а таксама 220 манаскіх супольнасцей і мужчынскіх ордэнаў.
Касцёл прызнае сваю адказнасць і імкнецца да справядлівасці
"Мы павінны прызнаць мінулыя памылкі і зрабіць усё магчымае, каб падтрымаць ахвяр", - адзначаецца ў справаздачы CARA, якая падкрэслівае, што агульная сума выплат склала дакладна 5.025.346.893 долараў ЗША.
Значная частка гэтых сродкаў была накіравана непасрэдна на кампенсацыі ахвярам, аплату юрыдычных паслуг, тэрапію і кансультацыі. Паводле інфармацыі Цэнтра, прыкладна чвэрць усіх выдаткаў была пакрыта страхавымі кампаніямі.
Большасць выпадкаў адносіцца да мінулага стагоддзя
За перыяд 2004-2023 гадоў было зарэгістравана 15 тысяч пацверджаных абвінавачванняў, прычым 80 працэнтаў выпадкаў мелі месца да 1990 года. Пік злоўжыванняў прыпаў на 1970-я гады, а толькі 3 працэнта выпадкаў датуюцца перыядам пасля 2000 года.
Даследаванне таксама выявіла, што сярод 4 490 злачынцаў 95 працэнтаў складалі святары, 4 працэнта – прадстаўнікі ордэнаў ці рэлігійных супольнасцей, і 1 працэнт – дыяканы. Варта адзначыць, што 86 працэнтаў з іх на момант паведамлення пра злоўжыванні ўжо памерлі, былі пазбаўлены сану або пакінулі актыўнае служэнне.
Інвестыцыі ў прадухіленне злоўжыванняў
Асаблівую ўвагу варта звярнуць на тое, што з 2004 года касцельныя ўстановы выдаткавалі больш за 727 мільёнаў долараў на праграмы па прадухіленні злоўжыванняў, прычым 80 працэнтаў гэтай сумы было інвеставана за апошняе дзесяцігоддзе. Паводле даследавання CARA, ніводная няўрадавая арганізацыя не выдзеліла такіх значных сродкаў на барацьбу з сексуальным насіллем у дачыненні да непаўналетніх.
