Белградскі кардынал заклікае да еўрапейскага касцельнага форуму

Кардынал Ладзіслаў Нэмет лічыць, што пасля апошняга Сінода Каталіцкі Касцёл рухаецца ў бок дэцэнтралізацыі, захоўваючы пры гэтым адзінства веры.

Аляксандр Амяльчэня - Vatican News

Белградскі арцыбіскуп падзяліўся сваім бачаннем будучыні Касцёла ў інтэрв'ю нямецкаму KNA. Па яго словах, мясцовыя асаблівасці будуць усё больш уплываць на жыццё мясцовых Касцёлаў.

"Адзінства веры павінна захоўвацца, як і роля Папы ў якасці прынцыпу адзінства. Аднак гэта не азначае, што каталіцкае жыццё павінна мець аднолькавую форму паўсюль", - падкрэсліў кардынал Нэмет.

Іерарх станоўча ацаніў рэформы, ініцыяваныя Сінодам па сінадальнасці, адзначыўшы, што яны надалі Касцёлу "новы імпульс" на працягу апошніх месяцаў. Ён таксама падкрэсліў унікальнасць бягучага сінадальнага працэсу.

"Упершыню мы назіраем працяг Сінода пасля яго завяршэння. Гэта звязана з тым, што размова ідзе пра сам спосаб быцця Касцёлам", - патлумачыў белградскі арцыбіскуп.

Кардынал Нэмет заклікаў да больш цеснага супрацоўніцтва паміж каталіцкімі Касцёламі ў Еўропе. Ён прапанаваў разгледзець магчымасць склікання еўрапейскага касцельнага сходу і адзначыў, што Сінод ужо дапамог разбурыць культурныя бар'еры паміж Касцёлам на Усходзе і Захадзе.