Кардынал Кох: важна высветліць дакладныя мэты экуменізму
Аляксандр Амяльчэня - Vatican News
У інтэрв'ю венскай касцельнай газеце Der Sonntag шматгадовы старшыня Дыкастэрыі спрыяння хрысціянскаму адзінству адзначыў істотную розніцу ў разуменні экуменічнага дыялогу паміж Усходнімі Цэрквамі і пратэстанцкімі супольнасцямі. Паводле яго слоў, у рыма-католікаў існуе агульнае з праваслаўнымі разуменне сутнасці імкнення да адзінства.
"З Усходнімі Цэрквамі мы падзяляем асноўныя перакананні пра тое, чым з'яўляецца Касцёл, і маем агульную мэту: аднавіць адзінства ў агульнай веры, сакрамэнтах і касцельных служэннях", - падкрэсліў кардынал Кох у інтэрв'ю ад 23 студзеня 2025 года.
Больш складаная сітуацыя назіраецца ў дыялогу з супольнасцямі, якія паўсталі ў выніку Рэфармацыі. "Шмат якія з іх лічаць, што адзінства азначае прызнанне ўсіх розных касцельных рэальнасцяў у якасці Касцёлаў, і што сума ўсіх існуючых Касцёлаў і ёсць адзіны Касцёл Хрыста", - патлумачыў іерарх.
"Такое ўяўленне не адпавядае нашаму разуменню, таму вельмі важна нанова абдумаць, якая ж насамрэч мэта экуменічнага руху", - падкрэсліў старшыня Дыкастэрыі спрыяння хрысціянскаму адзінству.
"Самае важнае, што мы можам зрабіць – гэта маліцца за адзінства. Калі мы молімся за адзінства, мы прызнаем, што людзі самі па сабе не могуць яго дасягнуць. Адзінства заўсёды з'яўляецца дарам Духа Святога ", - адзначыў іерарх.
На мінулым тыдні кардынал Кох прыняў удзел у экуменічным сімпозіуме ў Вене, прысвечаным падзеям 1054 года, якія доўгі час лічыліся афіцыйнай датай падзелу паміж хрысціянствам Усходу і Захаду. Падчас форуму было падкрэслена, што такое разуменне гістарычных падзей больш не з'яўляецца абгрунтаваным.
