Даследаванне: семінарысты ў Італіі актыўна асвойваюць сацсеткі

Амаль усе італьянскія семінарысты маюць профілі ў сацыяльных сетках, аднак большасць з іх праяўляе стрыманасць у публікацыі кантэнту і аддае перавагу рэальным зносінам.

Аляксандр Амяльчэня - Vatican News

Даследаванне, якое доўжылася тры гады, выявіла цікавую тэндэнцыю ў выкарыстанні сацыяльных сетак сярод будучых святароў у Італіі. Старшыня Асацыяцыі італьянскіх каталіцкіх інтэрнэт-старонак (WeCa) Фабіа Бальцэта прадставіў вынікі, якія паказваюць значны рост прысутнасці семінарыстаў у лічбавай прасторы.

"Для 88 працэнтаў клерыкаў сацыяльныя медыя ўяўляюцца карыснымі інструментамі ў душпастырскай працы, і яны плануюць выкарыстоўваць іх у сваім будучым служэнні", - адзначае Бальцэта. Паводле даследавання, найбольшай папулярнасцю карыстаецца WhatsApp – 96,2 працэнта, затым ідуць Facebook – 74,2 працэнта, Instagram – 70,8 працэнта, YouTube – 67,5 працэнта і TikTok – 15,3 працэнта.

Значным з'яўляецца той факт, што семінарысты захоўваюць разважлівы падыход да сваёй анлайн-актыўнасці. Амаль 27 працэнтаў апытаных прызнаюцца, што ніколі не публікуюць уласных пастоў, а 31,1 працэнта робяць гэта толькі раз ці два на месяц, абмяжоўваючыся пераважна рэпостамі кантэнту іншых інтэрнаўтаў.

Даследаванне таксама выявіла, што большасць семінарыстаў 64,4 працэнта адчуваюць патрэбу ў дадатковай фармацыі па выкарыстанні лічбавай прасторы. Гэта сведчыць пра іх адказны падыход да прысутнасці ў сацыяльных медыя і жаданне эфектыўна выкарыстоўваць іх у будучым служэнні.