Арцыбіскуп Кавалі: Меджугор’е – месца ласкі, дзе Бог шукае сустрэчы

Марыя Валодзіна - Vatican News

За апошнія сорак гадоў невялікі пасёлак у Босніі і Герцагавіне стаў адным з найбольш значных цэнтраў марыйнага культу, прыцягваючы мільёны пілігрымаў з усяго свету. У інтэрв’ю галоўнаму рэдактару ватыканскіх СМІ Андрэа Тарніелі арцыбіскуп Кавалі дзеліцца сваімі назіраннямі і досведам трохгадовай працы ў парафіі, дзе, паводле сведчанняў, з 1981 года адбываюцца аб’яўленні Маці Божай.

Звычайнае месца, якое стала духоўным цэнтрам

Меджугор’е – звычайнае, нічым не адметнае, месца, якое па ласцы Божай стала духоўным цэнтрам. Людзі прыязджаюць сюды з усяго свету, каб маліцца, наблізіцца да Езуса, і Панна Марыя суправаджае іх. “Гэта простая малітва: яны хочуць змяніць сваё жыццё, жыць лепш, чым раней, вырашыць праблемы, якія ў іх ёсць”. Ключавым момантам унутранага навяртання для многіх пілігрымаў становіцца пакаянне, - распавёў арцыбіскуп Кавалі.

Духоўныя плёны і пасланні

Іерарх адзначыў, што плёны, якія прыносіць Меджугор’е, з’яўляюцца істотным доказам яго духоўнай каштоўнасці. Вялікая колькасць людзей штогод наведвае гэта месца, моліцца, перажывае духоўны пераварот і атрымлівае важныя духоўныя плёны. Толькі за апошні год тут пабывалі два мільёны пілігрымаў, у тым ліку амаль 50 тысяч святароў. Арцыбіскуп Кавалі таксама падкрэсліў велізарную колькасць новых пакліканняў, якія адбываюцца ў гэтым месцы.

Важным напрамкам дзейнасці апостальскага візітатара ў Меджугор'і з'яўляецца публікацыя "меркаваных пасланняў”, якія дапамагаюць узбагаціць духоўнае жыццё, хоць і не дадаюць нічога новага да Аб'яўлення. Яны выдаюцца адзін раз у месяц пасля перакладу з харвацкай мовы на італьянскую і праверкі на адпаведнасць каталіцкаму веравучэнню.

Тэма міру

Арцыбіскуп Кавалі нагадаў, што ў Меджугор'і Марыя назвалася Каралевай міру, што вельмі актуальна для сучаснага свету. Адно з першых пасланняў у 1981 годзе кажа: “Мір, мір, мір, хай пануе мір”. Іерарх падкрэсліў, што мір павінен існаваць найперш паміж Богам і чалавекам, а затым і паміж людзьмі. Божыя запаведзі і ёсць правілы захавання свабоды і міру. Яны ўключаюць павагу да жыцця (не забі), каштоўнасць сям'і і ўзаемную павагу. Калі людзі прытрымліваюцца гэтых прынцыпаў, яны жывуць у міры, калі ігнаруюць іх, узнікаюць войны.

Месца дыялогу і прымірэння

Дыпламат нагадаў, што Меджугор’е размешчана ў рэгіёне, дзе суіснуюць розныя рэлігіі і культуры. Гэта дае магчымасць розным народамі весці дыялог, захоўваючы ўласную ідэнтычнасць, светапогляд, веру і спосаб жыцця. Захаванне ідэнтычнасці важнае для сапраўднага дыялогу. Калі ідэнтычнасць губляецца, сапраўдны дыялог становіцца немагчымым, што можа прывесці да трагедыі. Там, дзе існуюць розныя рэлігіі і лады жыцця, дыялог неабходны. “У Меджугор'і мы маем ясную ідэнтычнасць: веру ў Хрыста як адзінага Пана”, - сказаў арцыбіскуп Кавалі.

Прыязджайце ў Меджугор’е, бо гэта месца ласкі

Новыя нормы, апублікаваныя ў маі 2024 года Дыкастэрыяй веравучэння, дазволілі санктуарыю ў Меджугор’і развіваць культ марыйнай пабожнасці без абавязковага прызнання звышнатуральнасці аб’яўленняў. Апостальскі візітатар заклікаў вернікаў здзейсніць пілігрымку: “Прыязджайце ў Меджугор’е, бо гэта месца ласкі, дзе Бог жадае сустрэцца з чалавекам”.

Меджугор’е – месца, дзе народная вера ўзбагачаецца, маючы ў якасці арыенціру Божую Маці і ў якасці абсалютнага арыенціру – Хрыста. Людзі з праблемамі знаходзяць падтрымку ў Маці Божай, якая таксама пакутавала, як і яны. Яна суправаджае іх да Пана, які дае сілу жыць добра. Сапраўдная змена жыцця не азначае адмову ад сям’і або працы, яна адбываецца ўнутры. Вера дае ўпэўненасць, што з Панам можна пераадолець цяжкасці. “Вось вера простых людзей. Ружанец, Эўхарыстыя і Эўхарыстычная адарацыя”,- сказаў арцыбіскуп Кавалі.