Корсіка чакае Папу: партрэт мясцовага Касцёла
Аляксандр Амяльчэня - Vatican News
Хрысціянская вера на Корсіцы мае амаль дзве тысячы гадоў гісторыі. Першыя хрысціянскія супольнасці з'явіліся тут на мяжы III і IV стагоддзяў, а значны імпульс евангелізацыі надаў Папа Грыгорый Вялікі ў VI стагоддзі.
У мінулым на востраве існавала пяць дыяцэзій, а на мяжы XI-XII стагоддзяў Корсіка нават была асобнай касцельнай правінцыяй. Цікава, што да гэтага часу мітрапалітам тут быў сам Папа. У XVII стагоддзі існавала нават Карсіканская Папская Гвардыя, якая не толькі ахоўвала пантыфікаў, але і падтрымлівала парадак на вуліцах Рыма.
Сёння дыяцэзія Ажаксьё, якой з 2021 года кіруе кардынал Франсуа-Ксаўе Бусціё, аб'ядноўвае 280 тысяч вернікаў з 355-тысячнага насельніцтва. Радасным знакам з'яўляецца рост колькасці хростаў дарослых – на Вялікдзень 2024 года сакрамэнт прынялі 151 чалавек, што на 50 больш, чым годам раней.
Асаблівасцю мясцовай рэлігійнасці з'яўляецца глыбокая марыйная пабожнасць. Больш за сто касцёлаў і капліц прысвечаны Маці Божай. На востраве дзейнічае некалькі марыйных санктуарыяў, сярод якіх вылучаюцца Кампітэлу і Панкерачыя.
Важную ролю ў захаванні традыцый адыгрываюць 92 брацтвы, чальцы якіх дапамагаюць святарам у душпастырстве і клапоцяцца пра месцы культу. Літургія часта цэлебруецца на карсіканскай мове з выкарыстаннем традыцыйных паліфанічных спеваў ла пагела, якія ЮНЕСКА прызнала часткай сусветнай нематэрыяльнай спадчыны.
Праграма папскага візіту 15 снежня 2024 года ўключае сустрэчу з катэхуменамі каля старажытнага баптыстэрыя V стагоддзя, удзел у сімпозіуме пра народную рэлігійнасць, малітву з духавенствам у катэдры і цэлебрацыю святой Імшы на Плошчы Аўстэрліц.
Гэта будзе першы ў гісторыі папскі візіт на Корсіку, хаця ў 1952 годзе востраў наведаў будучы папа Ян XXIII, тады яшчэ як нунцый у Францыі.
