Новы генеральны сакратар Канферэнцыі Еўрапейскіх Цэркваў

Новым генеральным сакратаром Канферэнцыі еўрапейскіх цэркваў (KEK) стаў нямецкі лютэранін. Экуменічная арганізацыя аб’ядноўвае 114 праваслаўных, пратэстанцкіх, старакаталіцкіх і англіканскіх Цэркваў кантынента.

Аляксандр Амяльчэня - Vatican News

Да гэтага часу 60-гадовы тэолаг і пастар Франк Дытэр Фішбах, святар Царквы Паўночнага Рэйна-Вестфаліі, быў намеснікам генеральнага сакратара Канферэнцыі па сацыяльных пытаннях. Ён таксама займаўся экуменічнай і еўрапейскай праблематыкай.

Абраны ў 2023 годзе старшынёй KEK, грэчаска-праваслаўны архіепіскап Фіятэры і Вялікабрытаніі Нікітас (Луліас) падкрэсліў, што вылучэнне пастара Фішбаха, які ўступіць на пасаду летам, з'яўляецца выразам жадання павысіць ролю Цэркваў у фарміраванні будучыні Еўропы і ўкараніць хрысціянскія каштоўнасці ў палітычную сферу.

Папярэдні генеральны сакратар Канферэнцыі Еўрапейскіх Цэркваў, дацкі лютэранскі пастар Ёрген Скоў Сорэнсэн, сышоў у адстаўку ў снежні 2023 года, жадаючы прысвячаць больш часу сваёй сям'і ў Капенгагене.