Іракскі кардынал: мы зацікаўлены ў спыненні канфлікту ва Украіне

Пандэмія COVID-19 прынесла з сабой досвед сусветнай салідарнасці. Такі ж падыход нам патрэбны і сёння, каб спыніць вайну ва Украіне, - лічыць кардынал Луіс Рафаэль Сако.

Аляксандр Амяльчэня - Vatican News

Патрыярх Халдэйскай Царквы ўдзельнічаў у рымскай сустрэчы за мір, арганізаванай Супольнасцю святога Эгідзія, і 25 красавіка 2022 года правёў у яе рамках дыскусію аб вопыце, звязаным з пандэміяй.

У гутарцы з Vatican News ён падкрэсліў, што іракцы як мала хто разумеюць, наколькі каштоўным з'яўляецца мір. Таму яны так зацікаўлены ў спыненні канфлікту ва Украіне.

"Мы больш не можам дазволіць сабе канфліктаў, якія з'яўляюцца чымсьці абсурдным. Гэта павінна дайсці да кожнага з нас. Якімі салідарнымі мы былі падчас пандэміі, такімі павінны заставацца і цяпер. Таму што гэтая вайна паміж Расіяй і Украінай – новая пандэмія. Нас усіх хвалюе, што будзе далей, ці будзе прыменена ядзерная зброя. Калі палітыкі не могуць вырашыць гэты канфлікт, то мы, простыя людзі, павінны пайсці на мяжу паміж гэтымі краінамі і сказаць: "спыніце вайну", - эмацыянальна заявіў іерарх з Ірака.