Papa XIV Leo Əlcəzairin Böyük Məscidini ziyarət edib
Vatican News tərəfindən
Papa XIV Leo Afrikaya apostol səfərinə Əlcəzairin Böyük Məscidini ziyarətlə başlayıb; burada o, bu məkanın dərin mənəvi əhəmiyyətini vurğulayıb və bir anlıq sükut içində düşüncəyə qərq olub.
Məscidin başçısı Məhəmməd Məmun əl Qasim tərəfindən qarşılanan və onun qardaşlıq ruhunda söylədiyi sözləri dinləyən Papa belə deyib: “Bu düşüncələrə və bu mühüm sözlərə görə sizə təşəkkür edirəm. Bu ziyarət zamanı biz Allaha məxsus olan, ilahi və müqəddəs bir məkanı təcəssüm etdirən bir yerdəyik; bura çoxsaylı insanlar dua etmək və həyatlarında Uca Allahın hüzurunu axtarmaq üçün üz tuturlar.”
Papa, çıxışını davam etdirərək Müqəddəs Hipponlu Avqustin vasitəsilə bu ölkə ilə şəxsi bağlılığını xatırladıb və Əlcəzairi “mənim ruhani atamın torpağı” kimi təsvir edib. Papa həmçinin müraciətinin əsas mövzularını vurğulayıb: həqiqətin axtarışı, hər bir insanın ləyaqətinin tanınması və sülh quruculuğu üçün ortaq məsuliyyət. “Allahı axtarmaq,” – deyə o bildirib, – “eyni zamanda hər bir kişi və qadında Allahın surətini tanımaq deməkdir”; o əlavə edib ki, bu tanıma qarşılıqlı hörmətə və birgəyaşayışa çağırır.
Papa həmçinin məscid kompleksinin dini və intellektual vəzifələrinin vəhdətinə diqqət çəkərək, yaradılışı və insan şəxsiyyətinin ləyaqətini daha dərindən anlamaq üçün insan biliyinin inkişaf etdirilməsinin vacibliyini qeyd edib.
O, çıxışını Əlcəzair xalqı və bütün millətlər üçün dua etdiyini bildirərək yekunlaşdırıb və xalqlar arasında sülhün, ədalətin, barışığın və bağışlamanın artacağına ümidini ifadə edib.
Səfər zamanı Papanı Dinlərarası Dialoq üzrə Dikasteriyanın prefekti kardinal Corc Yakob Kuvakad və Əlcəzair arxiyepiskopu Jan-Pol Vesko müşayiət ediblər. Proqrama məscid üzrə bələdçili ekskursiya, rəsmi foto çəkilişi və Şərəf Kitabının imzalanması daxil olub. Papa həmin kitabda belə yazıb:
“Uca Allahın mərhəməti nəcib Əlcəzair xalqını və bütün bəşər ailəsini sülh və azadlıq içində qorusun.”
