Liturgiya oxunuşları: 7 AVQUST. Adi Dövrün XVIII həftəsinin cüməsi
BİRİNCİ OXUNUŞ Nahum 2,1.3; 3,1-3.6-7
Ey Nineva, həlak edən qüvvə qarşına çıxdı, istehkamını qoru, yolunu qoru, belini möhkəm qurşa, Bütün gücünü topla! İgidlərin qalxanları qıpqırmızıdır, cəngavərlərin libasları al rəngdədir. Onlar hazır olan gün döyüş arabalarının dəmirləri necə də parıldayır, şam ağacından nizələr havada oynayır! Qanlı şəhərin vay halına! O yalan və soyğunçuluqla doludur, orada quldurluğun ardı kəsilmir! Qamçı səsi, təkərlər gurultusu, çapan atların, yırğalanan döyüş arabalarının sədası! Süvarilər hücum edir, qılınclar parıldayır, nizələr bərq vurur, ölənlər yığın-yığın, cəsədlərin sayı yox, insanların ayağı meyitlərə dolaşır! Üstünə iyrənc şeyləri atacağam, səni rüsvay edəcəyəm, tamaşaya qoyacağam! Səni görənlərin hamısı səndən qaçıb belə deyəcək: “Nineva viran qaldı! Onun üçün kim ağlayacaq?” Haradan sənə təsəlli verənləri tapım?»
Təfsir
Nineviya Assur imperiyasının paytaxtı idi – böyük, əzəmətli və qüdrətli bir şəhər. Güclü silahlanmış və döyüşlərdə bərkimiş ordusu sayəsində Assuriya ətraf xalqları qorxu içində saxlayırdı. Kiçik və zəif İsrail xalqı bu təhlükəli qonşuluqla hesablaşmağa məcbur idi. Lakin İsrailin qüdrətli bir imperiyadan və möhtəşəm paytaxtdan daha böyük sərvəti var idi – onun Allahı, Yaradanı və Külli-İxtiyar Sahibi vardı. Allah peyğəmbər Nahum vasitəsilə sərt sözlərlə Nineviyanın məhv ediləcəyini bəyan edir ki, İsrail yaşamaqda davam etsin və öz missiyasını – Məsihin gəlişi üçün yol hazırlamaq vəzifəsini yerinə yetirsin. Heç bir bəşəri hakimiyyət Allahın iradəsinə qarşı dura bilməz. Eyni həqiqəti İsa Məsih Kilsə haqqında da bəyan edib: «Cəhənnəm qapıları ona qalib gələ bilməyəcək» (Matta 16,18). Biz bu Müqəddəs Yazını öz həyatımıza da tətbiq edə bilərik. Bəzən bizi əzən və sanki məğlubedilməz görünən çətinliklərlə üzləşirik. Belə anlarda gəlin qəlbimizi Ataya yüksəldək və adı «təsəlli» mənasını verən peyğəmbər Nahumla birlikdə üzərimizə kölgə salan şərin məhvini imanla seyr edək. Çünki bizi Rəbb qoruyur və Onun hüzurunda heç bir şər tab gətirə bilməz.
İNCİL Matta 16,24-28
Sonra İsa şagirdlərinə dedi: «Əgər bir kəs Mənim ardımca gəlmək istəyirsə, özündən imtina etsin və çarmıxını götürüb ardımca gəlsin. Kim canını xilas etmək istəyirsə, onu itirəcək, amma kim Mənə görə canını itirirsə, onu qoruyacaq. nsan bütün dünyanı qazanıb canını itirərsə, ona nə xeyri var? Yaxud insan öz canının əvəzinə nə verə bilər? Çünki Bəşər Oğlu Atasının izzəti içində Öz mələkləri ilə gələcək və o zaman hər kəsə öz əməlinə görə əvəzini verəcək. Sizə doğrusunu deyirəm: burada duranlardan bəzisi Bəşər Oğlunun Padşahlığı ilə gəldiyini görmədən ölməyəcək».
Təfsir
«Canını (həyatını) xilas etmək» nə deməkdir? Bəs onu nədən xilas etmək lazımdır? Hər bir insanın qəlbində mütləq həqiqətə, əbədi həyata və sonsuzluğa qarşı doymaq bilməyən bir həsrət yaşayır. Ölümün hər şeyi sona çatdıracağı və hər şeyin yox olacağı fikri insan ruhu üçün dözülməzdir. Bizi xilas etmək lazımdır: həyatın mənasızlığından, faniliyindən və keçiciliyindən. Bəs bu xilası bizə kim bəxş edə bilər? Əbədi Həyatın Özü və onun Mənbəyi olan İsa Məsih. Onun adı da məhz «Xilaskar» deməkdir. Çünki «başqa heç kimdə xilas yoxdur» (Həv 4, 12). Bu xilasa aparan yol Məsihin Öz yoludur. Onun ardınca getmək həyatın sınaqlarını xaç kimi qəbul etmək, onları Xilaskarı qarşılamaq üçün bir fürsətə çevirmək deməkdir. Bəs İsanın «burada duranlardan bəziləri İnsan Oğlunun Öz Padşahlığında gəldiyini görməyincə ölümü dadmayacaqlar» dediyi insanlar kimlərdir? Bunlar Müqəddəs Ruhu qəbul edənlərdir. Pentikost günü onlar həvari Peterin ilk vəzini dinləyən insanlar idi. Bizim üçün isə bu, Vəftiz və digər Müqəddəs Sirlər vasitəsilə Müqəddəs Ruhu qəbul etdiyimiz andır. Müqəddəs Messada İsa Özünü Bədəni, Qanı, Canı və İlahiliyi ilə bizə bəxş edir. Bu, Onun artıq gerçəkliyə çevrilmiş Padşahlığıdır və o, bizim də həyatımızın gerçəkliyinə çevrilə bilər. Məhz buna görə də Yevxaristiya mərkəzli həyat bu İncil parçasının ən kamil və ən dolğun şərhidir.
