Liturgiya oxunuşları: 21 İYUN. Adi Dövrün XII Rəbb günü
BİRİNCİ OXUNUŞ Yer 20,10-13
Çünki çoxlarının «Hər tərəfdə dəhşət! Onu mühakimə edin, biz də onu mühakimə edək!» deyə pıçıldaşdığını eşitdim. Bütün güvəndiyim adamlar büdrəməyimi gözləyərək «Bəlkə aldanar, onda onu məğlub edərik, ondan qisasımızı alarıq» dedilər. Ancaq Rəbb igid bir döyüşçü kimi mənimlədir. Buna görə də məni təqib edənlər büdrəyəcək, qalib gələ bilməyəcək. Uğur qazana bilmədikləri üçün böyük xəcalət çəkəcəklər. Rüsvayçılıqları əbədi olacaq, heç vaxt unudulmayacaq. Ancaq, ey Ordular Rəbbi, Sən salehi sınağa çəkirsən, fikri və ürəyi görürsən. Qoy gözüm Sənin onlardan alacağın qisası görsün! Çünki işimi Sənə tapşırdım. Rəbbi tərənnüm edin, Rəbbə həmd edin! Çünki O, fəqiri zalımların əlindən qurtardı.
Təfsir
Birinci oxunuş bizə Yeremya peyğəmbərin «etirafını» təqdim edir. Bu, onun qəzəbini, ağrısını və qorxusunu Allaha yönəltdiyi səmimi bir fəryaddır: «Çünki çoxlarının «Hər tərəfdə dəhşət! Onu mühakimə edin, biz də onu mühakimə edək!» deyə pıçıldaşdığını eşitdim. Bütün güvəndiyim adamlar büdrəməyimi gözləyir». Lakin peyğəmbər ruhdan düşmür və sınmır. Çünki o anlayır ki, hamı onu tərk etsə belə, Allah onunladır: «Ancaq Rəbb igid bir döyüşçü kimi mənimlədir. Buna görə də məni təqib edənlər büdrəyəcək, qalib gələ bilməyəcək». Böhran, narahatlıq və qorxu insan həyatının adi təcrübələrindəndir, insan təbiətinin ayrılmaz hissəsidir. Müqəddəs Yazı heç vaxt bu reallığı gizlətməyib və ya kiçiltməyib. Əksinə, o, insanı öz hisslərini düzgün istiqamətləndirməyə, kömək fəryadını Kimə yönəltməli olduğunu anlamağa öyrədir. Məhz buna görə Məzmur da bizi Allahın Kəlamına belə cavab verməyə çağırır: «Ey Allah, böyük məhəbbətinə görə məni eşit».
İKİNCİ OXUNUŞ Rom 5, 12-15
Beləliklə, günah bir insan vasitəsilə, ölüm də günah vasitəsilə bu dünyaya gəldi. Beləcə ölüm bütün insanlara yayıldı, çünki hamı günah etdi. Qanundan əvvəl də dünyada günah var idi. Amma qanun olmayanda günah hesaba alınmır. Lakin Adəmdən Musaya qədər ölüm hamıya, hətta Adəmin əmri pozmasına bənzər bir günah etməyənlərə də hökmranlıq etdi. Adəm o gələcək İnsanın əvvəlcədən göstərilən təsviri idi. Amma Allahın ənamı təqsir kimi deyil. Çünki bir adamın təqsiri üzündən çox adam öldüsə də, Allahın lütfü və bir Adamın, yəni İsa Məsihin lütfü ilə verilən ənam bir çoxları üçün daha böyük təsir göstərdi.
Təfsir
İkinci oxunuş da insanın süqutu mövzusuna toxunur və ilk günahın təcrübəsini xatırladır. Məhz həmin günah səbəbindən ölüm bütün insanlara keçdi: «Çünki bir adamın təqsiri üzündən çox adam öldüsə də, Allahın lütfü və bir Adamın, yəni İsa Məsihin lütfü ilə verilən ənam bir çoxları üçün daha böyük təsir göstərdi.». Biz həyat yolumuzda çətinliklərin və zəifliklərin bizi necə ləngitdiyini aydın görürük. Lakin eyni zamanda Allahın İsa Məsihdə hər birimiz üçün etdiyi işin bundan qat-qat böyük olduğunu da görürük. İnsan yalnız özünə qapandıqda qorxular və günahkarlıq hissi daha da güclənir. Amma Allahın Kəlamı ilə qarşılaşdıqdan sonra hər şey öz həqiqi ölçüsünü alır. Başqa sözlə desək, Allaha etibar qorxunu tamamilə aradan qaldırır və Onun lütfü qarşısında qorxunun nə qədər əsassız olduğunu üzə çıxarır.
İNCİL Matta 10, 26-33
İsa şagirdlərinə belə dedi: Qorxmayın. Çünki elə örtülü bir şey yoxdur ki, aşkara çıxmayacaq və elə gizli bir şey yoxdur ki, bilinməyəcək. Sizə qaranlıqda dediklərimi gün işığında söyləyin və qulağınıza pıçıldananı damlardan bəyan edin. Bədəni öldürüb canı öldürə bilməyənlərdən qorxmayın. Həm canı, həm bədəni cəhənnəmdə məhv edə bilən Allahdan qorxun. İki sərçə bir qara pula satılmırmı? Onlardan biri belə, Atanızın izni olmadan yerə düşməz. Sizin başınızdakı saçlar belə, sayılıb. Ona görə də qorxmayın, siz saysız-hesabsız sərçədən daha dəyərlisiniz. İnsanlar qarşısında Məni iqrar edən hər kəsi Mən də göylərdə olan Atamın qarşısında iqrar edəcəyəm. Amma kim insanlar qarşısında Məni inkar etsə, Mən də onu göylərdə olan Atamın qarşısında inkar edəcəyəm.
Təfsir
İncilin mətni, hər bazar günü olduğu kimi, birinci oxunuşun mövzusu ilə səsləşir. Təqiblər və qorxu həm keçmişin, həm də bu günün peyğəmbərlərinin həyat təcrübəsinin bir hissəsidir. Burada peyğəmbər dedikdə, Allahın Padşahlığının dəyərlərini açıq, qorxmadan və utanmadan bəyan etməyə çağırılan hər bir vəftiz olunmuş insan nəzərdə tutulur. Məhz buna görə İsa Öz şagirdlərini ruhlandıraraq belə deyir: «Onlardan qorxmayın. Çünki elə gizli bir şey yoxdur ki, aşkara çıxmasın və elə sirr yoxdur ki, bilinməsin. Sizə qaranlıqda dediklərimi işıqda söyləyin... Bədəni öldürüb canı öldürə bilməyənlərdən qorxmayın». Bəzən insan düşünə bilər ki, Allahın onunla maraqlanmağa vaxtı yoxdur və ya onun həyatına diqqət yetirmir. Lakin həqiqətdə heç nə Allahın nəzərindən yayınmır. Əgər O, göydəki quşları belə unutmursa, onda hər bir addımımızı xüsusi məhəbbətlə izləyəcək və yönəldəcəkdir. Məsihdə yaşamaq insana həyat yolunda qorxmadan irəliləmək gücü verir. Çünki O, həmişə bizimlədir.
