Liturgiya oxunuşları: 2 İYUN. Adi Dövrün IX həftəsinin çərşənbə axşamı
BİRİNCİ OXUNUŞ 2 Peter 3, 12-15a. 17-18
Allahın zühur gününü gözləyərək tezləşdirməlisiniz. O gün göylər od tutub məhv olacaq və ünsürlər yanıb əriyəcək. Amma biz Allahın vədinə əsasən salehliyin sakin olacağı yeni göyləri və yeni yeri gözləyirik. Buna görə, sevimlilər, madam ki bunları gözləyirsiniz, Allahın önündə ləkəsiz və nöqsansız olaraq sülh içində yaşamağa səy göstərin. Sevimli qardaşımız Paulun da ona bəxş edilmiş müdrikliklə sizə yazdığı kimi, Rəbbimizin səbrini də xilas fürsəti kimi sayın. Beləliklə, siz, ey sevimlilər, bunu əvvəlcədən bilib pozğun adamlar sizi aldadaraq yoldan azdırmasın və sabit vəziyyətinizdən ayrılmayasınız deyə özünüzü qoruyun. Lakin Rəbbimiz və Xilaskarımız İsa Məsihin lütfündə və Onu tanımaqda böyüyün. Ona indi və əbədi olaraq izzət olsun! Amin.
Təfsir
Tarixin axarı naməlum bir sonluğa doğru deyil, Müqəddəs Peterin öz məktubunda bildirdiyi kimi, Rəbb ilə görüş anına doğru yönəlmişdir. Bu, kor tale deyil, əksinə, gözlənilməli, arzu edilməli və hazırlanmalı olan bir həqiqətdir. Bu həqiqət insanı yer üzündəki məsuliyyətlərindən uzaqlaşdırmır; əksinə, bizi elə yaşamağa sövq edir ki, Rəbb bizi həyat yolunda Öz lütfündə və Onu tanımaqda daim irəliləməyə can atan insanlar kimi tapsın. Bu isə həyatımızı təqva və dua içində keçirmək, salehliyin məskən salacağı yeni göyləri və yeni yeri gözlədiyimizə dair möhkəm ümidlə yaşamaq deməkdir. Rəbb gələcəkdir. Buna qəti əmin ola bilərik. Buna görə də bizim üçün ən vacib olan şey həyatımızı Allahın iradəsinə uyğun şəkildə, Onunla ünsiyyətdə yaşamaqdır.
İNCİL Mark 12, 13-17
Sonra İsanı dediyi sözlərlə tələyə salmaq üçün fariseylərdən və hirodçulardan bəzisini Onun yanına göndərdilər. Onlar gəlib İsaya dedilər: «Müəllim, biz bilirik ki, Sən etibarlı adamsan və heç kimə tərəfkeşlik etmirsən. Çünki insanlar arasında fərq qoymursan və Allahın yolunu həqiqətə görə öyrədirsən. Bizim üçün qeysərə vergi verməyə icazə var ya yox? Biz vergi verək ya yox?» Onların ikiüzlülüyünü bilən İsa dedi: «Məni niyə sınağa çəkirsiniz? Mənə bir dinar gətirin, baxım». Onlar da gətirdilər. İsa soruşdu: «Sikkənin üstündəki bu təsvir və yazı kimindir?» Ona dedilər: «Qeysərin». İsa onlara dedi: «Elə isə, qeysərin haqqını qeysərə, Allahın haqqını Allaha verin». Onlar İsanın sözlərinə heyrətləndilər.
Təfsir
İsa ilə fariseylər arasında Məbəddə başlamış mübahisə davam edir. Bu dəfə müzakirənin mövzusu verginin ödənilməsinin qanuniliyi məsələsidir. Yəhudilər bu vergini bəyənmirdilər, çünki söhbət Allahın Özünün onlara bəxş etdiyi torpaqda yaşamaq müqabilində ödənilən haqdan gedirdi. Üstəlik, bu vergi birbaşa işğalçı hakimiyyətə verilirdi. Beləliklə, əgər Müəllim «bəli» desəydi, öz həmvətənlərini Özünə qarşı qaldırmış olardı; «xeyr» desəydi, Roma hakimiyyətinə qarşı çıxmış sayılardı. İsa bu tələni ifşa edir və əlindəki sikkəni göstərərək soruşur: «Bu surət və yazı kimə məxsusdur?» Onlar cavab verirlər: «Qeysərə». O zaman İsa belə buyurur: «Elə isə qeysərin haqqını qeysərə, Allahın haqqını isə Allaha verin». Rəbb bu mürəkkəb düyünü heyrətamiz hikmətlə açır. O, qeysərin ilah sayılması düşüncəsini rədd edir və göstərir ki, əgər herodçular qeysərin onlara bəxş etdiyi keçici hakimiyyəti müdafiə etmək istəyirlərsə, bunu etsinlər, hətta bunun müqabilində öz ləyaqətlərini və vicdanlarını itirmək bahasına olsa belə. Lakin bununla yanaşı İsa daha dərin bir həqiqəti açıqlayır: Allah Allahdır və insan, Yaradanın surətini daşıyan canlı Allahın ən böyük izzətidir. Qoy Rəbb bu gün bizə Ona məxsus olmağın sevincini dadmağı və Onun hüzurunda həqiqi rahatlıq, əmin-amanlıq və daxili sülh tapmağı nəsib etsin.
