Liturgiya oxunuşları: 17 İYUN. Adi Dövrün XI həftəsinin çərşənbəsi
BİRİNCİ OXUNUŞ 2 Pad 2,1.6-14
Rəbb İlyası qasırğa ilə göyə qaldırmazdan əvvəl İlyas və Elişa Qilqaldan getdilər. İlyas ona dedi: «Burada qal, çünki Rəbb məni İordan çayının yanına göndərir». Elişa dedi: «Var olan Rəbbə və sənin canına and olsun ki, səndən əl çəkmərəm». Onlar getdilər. Peyğəmbərlərdən əlli adam gedib uzaqda onların qarşısında dayandı. Onlar da İordan çayının yanında dayandılar. İlyas cübbəsini götürdü və onu büküb suya vurdu. Su iki yerə ayrıldı və onlar quru yerin üstündən keçdilər. Onlar keçəndən sonra İlyas Elişaya dedi: «Mən sənin yanından götürülməzdən əvvəl məndən bir şey istə, sənin üçün nə edim?» Elişa dedi: «Qoy indi səndə olan ruh ikiqat artıq məndə olsun». İlyas dedi: «Sən çətin bir şey istədin. Əgər sənin yanından götürüldüyümü görsən, səninlə belə olacaq, yoxsa bu olmayacaq». Onlar danışa-danışa gedərkən qəflətən odlu bir araba və odlu atlar göründü, onları bir-birindən ayırdı və İlyas qasırğa ilə göyə qaldırıldı. Elişa bunu görüb qışqırdı: «Atam, ey atam! İsrailin arabası və atlıları!» O, İlyası daha görməyəndə öz paltarını götürdü və onu cırıb iki yerə böldü. Sonra İlyasın əynindən düşən cübbəni götürüb geri döndü və İordan çayının sahilində dayandı. İlyasın əynindən düşən cübbəni götürüb suya vurdu və dedi: «İlyasın Allahı Rəbb haradadır?» O da cübbəni suya vuranda su iki yerə ayrıldı. Elişa oradan keçdi.
Təfsir
Padşahlar Kitabının ikinci fəslində göyə aparılan İlyasın hekayəsi başa çatır: «Rəbb İlyası qasırğa içində göyə qaldırmaq istədiyi zaman... qəflətən odlu bir araba və odlu atlar göründü, onları bir-birindən ayırdı və İlyas qasırğa ilə göyə qaldırıldı. Elişa bunu görüb qışqırdı: «Atam, ey atam! İsrailin arabası və atlıları!». Liturgiyaya daxil olmayan əvvəlki fəsillərdə padşah Axav döyüşdə həlak olur və itlər onun qanını yalayır. Burada isə İlyas sanki alov kimi göyə yüksəlir. Demək olar ki, hər kəs necə yaşamışsa, elə də bu dünyadan köçür. İlyas Allahın Kəlamını alov kimi bəyan etmiş, şagirdlərinin qəlbini ilahi qeyrətlə alışdırmışdı. Buna görə də onun göyə yüksəlişi də həmin alovlu obrazla təsvir olunur. Bu hekayədə insanı təsəlli edən başqa bir həqiqət də var: Allah Öz dostlarının qayğısına qalır və onları Öz hüzuruna qəbul edərkən necə böyük məhəbbətlə davranır. Lakin vurğulanmalı olan daha bir məqam var. Göyə yüksəlməzdən əvvəl İlyas sevimli şagirdinə belə deyir: «Məndən ayrılmamışdan əvvəl söylə, sənin üçün nə edim?» Bu, sanki atanın oğluna ünvanladığı son sualdır. Elişa isə oğul kimi ona məxsus olan mirası istəyir: «Səndə olan ruh ikiqat mənə verilsin». Elişa nə qədər istədisə, bir o qədər də aldı. Müqəddəs Yazı deyir: «İlyasdan düşmüş əbanı götürdü, suya vurub dedi: “Hanı İlyasın Allahı olan Rəbb?” Sonra yenə suya vurdu və sular iki tərəfə ayrıldı. Elişa isə keçib getdi». Çünki bugünkü Məzmurda dua etdiyimiz kimi, saleh insanın qəlbi Rəbbə ümid bəslədiyi üçün möhkəm və sarsılmaz qalır.
İNCİL Matta 6,1-6.16-18
Ehtiyatlı olun, siz saleh iş görəndə bunu insanların önündə, onlara göstərmək üçün etməyin. Yoxsa göylərdə olan Atanızdan mükafat almazsınız. Ona görə də sədəqə verdiyin zaman önündə şeypur səsi ilə car çəkmə. Çünki adamlar onları izzətləndirsin deyə ikiüzlülər sinaqoqlarda və küçələrdə belə edirlər. Sizə doğrusunu deyirəm: onlar mükafatlarını alıblar. Amma sən sədəqə verdiyin zaman sol əlin sağ əlinin nə etdiyini bilməsin. Belə ki verdiyin sədəqə gizli qalsın. Gizlində olanı görən Atan səni mükafatlandıracaq. Dua etdiyiniz zaman da ikiüzlülər kimi olmayın. Çünki belələri adamlar onları görsün deyə sinaqoqlarda və küçə tinlərində durub dua etməyi sevirlər. Sizə doğrusunu deyirəm: onlar mükafatlarını alıblar. Amma sən dua etdiyin zaman öz otağına gir və qapını örtüb gizlində olan Atana dua et. Gizlində olanı görən Atan səni mükafatlandıracaq. Oruc tutduğunuz zaman ikiüzlülər kimi qaşqabaqlı gəzməyin. Onlar oruc tutduqlarını insanlara göstərmək üçün üzlərini tutqun hala salırlar. Sizə doğrusunu deyirəm: onlar mükafatlarını alıblar. Amma sən oruc tutanda başına yağ çək və üzünü yu. Belə ki insanlara deyil, gizlində olan Atana oruclu görünəsən. Gizlində olanı görən Atan səni mükafatlandıracaq.
Təfsir
Əgər Elişa dilədiyini əldə etdisə, bu, ilk növbədə onun müəllimi İlyasla xüsusi münasibət qurmağı bacardığı və Allahın onun səmimi qəlbinin səsinə qulaq asdığı üçün idi. Məhz bu həqiqəti İsa bugünkü İncildə bizə xatırladır: «Dua etdiyiniz zaman da ikiüzlülər kimi olmayın. Amma sən dua etdiyin zaman öz otağına gir və qapını örtüb gizlində olan Atana dua et. Gizlində olanı görən Atan səni mükafatlandıracaq». Həm duanı, həm də bugünkü İncildə qeyd olunan digər bütün ruhani əməlləri Elişanın nümunəsinin işığında yenidən dərk edə bilərik. Əsas məsələ nə etdiyimiz və ya nə qədər etdiyimiz deyil. Əsas məsələ bunları kimin naminə etdiyimizdir. Əgər etdiklərimizi insanların diqqətini cəlb etmək üçün edirik, artıq öz mükafatımızı almışıq. Əgər onları Allah naminə edirik, mükafatımızı Allahdan alacağıq. Hətta bundan da artıq: Allah Öz dostu İlyası alovlu araba ilə yanına apardığı kimi, bir gün bizi də Öz hüzuruna qəbul edəcək və səmavi izzətinə qovuşduracaq. Gəlin Rəbdən diləyək ki, bizə daim Onun hüzurunda yaşamağı, bütün əməllərimizi yalnız Onun məhəbbəti naminə yerinə yetirməyi öyrətsin.
