Liturgiya oxunuşları: 10 MAY. Pasxanın VI Rəbb günü
BİRİNCİ OXUNUŞ Həv 8,5-8.14-17
Filip də Samariya şəhərinə gəlib Məsihi vəz edirdi. Filipi eşidib, göstərdiyi əlamətləri görən izdiham onun sözlərinə birlikdə diqqət yetirirdi. Natəmiz ruha tutulan çox adamdan bu ruhlar bərkdən çığıraraq çıxır, çox iflic və ayaqları şikəst olanlar şəfa tapırdı. Ona görə bu şəhərdə bol sevinc var idi. Yerusəlimdə qalan həvarilər Samariyalıların Allahın kəlamını qəbul etdiklərini eşidəndə Peterlə Yəhyanı onların yanına göndərdi. Peterlə Yəhya oraya çatanda dua etdilər ki, Samariyalı imanlılar Müqəddəs Ruhu alsınlar. Çünki Ruh hələ onların heç birinin üzərinə enməmişdi, sadəcə olaraq Rəbb İsanın adı ilə vəftiz olmuşdular. Sonra Peterlə Yəhya əllərini onların üstünə qoydular və onlar Müqəddəs Ruhu aldılar.
Təfsir
Xristianlara qarşı təqiblər səbəbindən İsanın şagirdləri Yerusəlimi tərk etməyə məcbur olurlar. Lakin bu sürgün müjdəçiliyin ruhlandırıcı təcrübəsinə çevrilərək imanı Müqəddəs Şəhərin hüdudlarından kənara çıxarır. Həvari Filip Samariya şəhərinə gəlir və orada Məsihi təbliğ edir. Şəhər sakinlərinin reaksiyası isə yekdil olur: onun göstərdiyi möcüzə və əlamətləri görən insanlar böyük diqqətlə ona qulaq asırdılar. Bu “məcburi” missionerliyin nəticəsi olaraq “o şəhərdə böyük sevinc yarandı”. Filipin uğurunu eşidən həvarilər onların yanına Peter və Yəhyanı göndərirlər. Filip Rəbbin Kəlamını təbliğ edərək insanların qəlbini və zehnini açırdı. Peter və Yəhya isə Müqəddəs Ruhun hədiyyəsinin nazil olması üçün dua etmək məqsədilə gəlmişdilər. Bu, həvarilərin niyyət birliyini və məsafələrə, mədəni fərqlərə baxmayaraq Kilsəni birləşdirən qırılmaz bağı vurğulayır. Keçmişdə olduğu kimi, bu gün də Kilsənin və, deməli, hər birimizi yeganə missiyası insanlara İncil sevincinə toxunmaq imkanı verməkdir. “Ey bütün dünya əhli, cuşa gəlib Allaha nida edin!” - bizim ümumi çağırışımız da Uca Allahı izzətləndirməkdir.
İKİNCİ OXUNUŞ 1 Pet 3,15-18
Lakin Məsihi Rəbb kimi ürəyinizdə müqəddəs tutun. Daxilinizdə olan ümid barəsində sizdən hesabat istəyən hər kəsə cavab vermək üçün hazır olun. Vicdanınızı təmiz tutaraq bunu həlimliklə və ehtiramla edin ki, Məsihdə olan yaxşı davranışınızı təhqir edənlər sizə atdıqları böhtandan utansınlar. Əgər Allahın iradəsi budursa, yaxşılıq etdiyi üçün əzab çəkmək pislik etdiyi üçün əzab çəkməkdən yaxşıdır. Çünki saleh olan Məsih də saleh olmayanlar uğrunda, onların günahları üçün bir dəfə əzab çəkdi ki, sizi Allahın hüzuruna gətirsin. O cismən edam edilmiş, amma ruhən həyata qovuşmuşdur.
Təfsir
Əgər Filip Samariyada müjdəçiliyin canlı nümunəsini göstərirdisə, həvari Peterin məktubu hər birimizin yadda saxlamalı olduğu bir neçə mühüm istiqaməti təqdim edir. İlk qayda budur: “Rəbb Allahı qəlblərinizdə müqəddəs tutun.” Məhz bu, bizim başlanğıc nöqtəmiz və yol göstərən ulduzumuzdur. Yalnız bu daxili ibadət sayəsində ikinci çağırış mümkün olur: “Daxilinizdə olan ümid barəsində sizdən hesabat istəyən hər kəsə cavab vermək üçün hazır olun.” Şəhadət vermək - qəlbin sükutunda yaşayan Məsihdən qaynaqlanan seçimini izah etmək deməkdir. Peter bu cavabın necə verilməli olduğunu da xüsusi vurğulayır: təvazökarlıqla, aqressiyasız, həlimlik və ehtiramla, təmiz vicdanla. Yadda saxlamaq vacibdir ki, əgər Allahın iradəsi belədirsə, yaxşı işlərə görə əzab çəkmək pis işlərə görə əzab çəkməkdən daha yaxşıdır. Axı Məsih də günahlarımız uğrunda əzab çəkdi: Saleh olan, saleh olmayanlar uğrunda. Bütün insanlar üçün birdəfəlik gətirilmiş Məsihin bu qurbanı qəlbləri açır, ağılları nurlandırır və insanları sevinclə doldurur, Filipin təbliği zamanı Samariyada olduğu kimi.
İNCİL Yəhya 14,15-21
Əgər Məni sevirsinizsə, əmrlərimə riayət edəcəksiniz. Mən də Atadan xahiş edəcəyəm və O sizə başqa bir Vəsatətçi göndərəcək ki, daim sizinlə olsun. O, həqiqət Ruhudur. Onu dünya qəbul edə bilməz, çünki Onu nə görür, nə də tanıyır. Sizsə Onu tanıyırsınız, çünki sizinlə qalır və daxilinizdə olacaq. Sizi yetim qoymaram, yanınıza gələcəyəm. Az bir müddətdən sonra dünya daha Məni görməyəcək, amma siz Məni görəcəksiniz. Mən yaşadığım üçün siz də yaşayacaqsınız. O gün biləcəksiniz ki, Mən Atamdayam, siz Məndəsiniz və Mən sizdəyəm. Kim əmrlərimə bağlı qalıb onlara riayət edirsə, Məni sevən odur. Məni sevəni Atam sevəcək. Mən də onu sevib Özümü ona zahir edəcəyəm».
Təfsir
Biz Rəbbin Göylərə Yüksəlməsi bayramına yaxınlaşırıq. İsa şagirdlərini sadəcə ayrılıq anına deyil, Özünün “Ataya dönüşünü” dərk etməyə hazırlayır. Bu, yoxluğa çəkilmək deyil, yeni bir mövcudluq tərzinə keçiddir: “Sizi yetim qoymayacağam. Siz biləcəksiniz ki, Mən Atamdayam, siz Məndəsiniz və Mən sizdəyəm.” Bu keçid bizdən xüsusi diqqət tələb edir: “Əgər Məni sevirsinizsə, əmrlərimi yerinə yetirin.” İsa burada zorla qəbul etdirilən qanundan deyil, təbii şəkildə şəxsi məsuliyyətə çevrilən bir hədiyyədən danışır. Burada itaət cəza qorxusunun deyil, məhəbbətin bəhrəsidir. Rəbb vəd edir: “Mən Ataya yalvaracağam və O sizə başqa bir Təsəlliverən verəcək ki, əbədi olaraq sizinlə qalsın.” Söhbət yardım etmək üçün “yanımızda duran” Müqəddəs Ruhdan gedir. Onun rolu nədir? O, bizim də İsa kimi sevə bilməyimizin, eyni məhəbbət qüdrətinə sahib olmağımızın təminatıdır. O, səssiz və incə bir Hüzurdur — xatırladan, nurlandıran və gündəlik əməllərimizə ilham verən daxili Müəllimdir. İsa bizə yer hazırlamaq üçün göylərə yüksəlir. Bizim vəzifəmiz isə baxışlarımızı bu məqsədə yönəltmək və bu arada yer üzündə yalnız bir sözlə, həqiqi ağırlığı olan məhəbbət sözü ilə, İncilin müjdəsini bəyan etməyə davam etməkdir. Bu məhəbbət yalnız onu qəbul edənə deyil, onu yaşayan insana da xeyir gətirir: “Məni sevən Atam tərəfindən seviləcək; Mən də onu sevəcəyəm və Özümü ona aşkar edəcəyəm.”
