Liturgiya oxunuşları: 14 APREL. Pasxanın II həftəsinin çərşənbə axşamı
BİRİNCİ OXUNUŞ Həv 4,32-37
İmanlıların hamısı canbir qəlbdə idi. Heç kim öz əmlakına «bu mənimdir» demir, bütün əmlaklarından birgə istifadə edirdi. Həvarilər Rəbb İsanın dirilməsi barədə böyük qüdrətlə şəhadət edirdilər və hamısının üzərinə bol-bol lütf ehsan olunurdu. Onların arasında heç kim yoxsul deyildi. Çünki onların arasında torpaq və ev sahibi olanlar mülkünü satıb pulunu gətirər, həvarilərin ixtiyarına verərdi. Bu da hər kəsə ehtiyacına görə paylanardı. Məsələn, Kiprdə anadan olan, həvarilərin Barnaba adlandırdığı (mənası «Təsəlli oğlu») Levili Yusif sahib olduğu torpaq sahəsini sataraq pulunu gətirib həvarilərin ixtiyarına verdi.
Təfsir
İncil mülkiyyət hüququnu ləğv etmir; əksinə, bu hüquq müqəddəsdir. Buna görə də “onlar bütün əmlaklarından birgə istifadə edirdi” ifadəsini hərfi mənada anlamaq yanlışdır. Bu prinsipin dərin mənası Həvarilərin İşləri Kitabında açılır: “Heç kim öz əmlakına «bu mənimdir» demirdi”. Əgər sahib olduqlarımızı müstəsna mülkiyyətimiz hesab etmiriksə, deməli, onlar, başqalarına da aiddir. Bu, hər cür şeyə tətbiq olunur. Bunun əksi olan yanaşma isə nemətləri yalnız öz istəklərimiz üçün istifadə etmək, bəhrəsiz sahiblik içində qapanmaq və heç nəyi bölüşə bilməməkdir. Müqəddəs Paul deyir: “Hər şey sizindir; siz isə Məsihə məxsussunuz, Məsih isə Allaha məxsusdur” (1 Kor 3,22–23). Sahib olduqlarımızın hamısı Allah tərəfindən bəxş edilib və öz mahiyyəti etibarilə paylaşılmaq üçün nəzərdə tutulub.
İNCİL Yəhya 3,7-15
Sənə “yenidən doğulmalısınız” dediyimə heyrət etmə. Yel istədiyi yerdə əsir, onun səsini eşidirsən, amma haradan gəlib haraya getdiyini bilmirsən. Ruhdan doğulmuş adam da belədir». 9 Nikodim «Bu şeylər necə ola bilər?» deyə soruşdu. İsa ona cavab verdi: «Sən İsrailin müəllimisən. Bunları bilmirsənmi? Doğrusunu, doğrusunu sənə deyirəm: biz bildiyimizi söyləyirik, gördüyümüzə şəhadət edirik, amma siz bizim şəhadətimizi qəbul etmirsiniz. Əgər Mən sizə yerdəki işlərdən danışanda inanmırsınızsa, göydəki işlərdən danışsam, necə inanacaqsınız? Heç kəs göyə çıxmayıb, yalnız göydən enmiş Bəşər Oğlu orada olub. Musa çöldə ilanı yuxarı qaldırdığı kimi Bəşər Oğlu da yuxarı qaldırılmalıdır ki, Ona iman edən hər kəs əbədi həyata malik olsun».
Təfsir
İsa Nikodimlə açıq danışa bilər, çünki o, savadlı bir fariseydir. Lakin ilahi həqiqətləri anlamaq üçün təvazökarlıq və ürək təmizliyi zəruridir; bilik isə yalnız müəyyən bir həddə qədər kömək edir. Və həqiqətən də Nikodim anlamır. Hər şeyi addım-addım izah etmək əvəzinə, İsa bu gecə söhbətində sudan və Ruhdan da daha mürəkkəb bir obrazdan istifadə edir: əbədi həyatı yer üzündən ucaldılmış Onu görən əldə edəcək, necə ki Musa ilanı dirək üzərində ucaltdı. Bu sözlərlə Rəbb Nikodimə Çarmıxın sirrini bir qədər açır: yalnız onda aydın olur ki, doğulmaq üçün əvvəlcə ölmək lazımdır və “köhnə insanın” külündən iman lütfü ilə yenilənmiş yeni insan dirilir. Bəzi müqəddəslər deyirdilər ki, Çarmıx Rəbbin həqiqi “kitabıdır”: onu oxuyaraq hər şeyi anlamaq və Allahı tanımaq olar. İnsan hətta savadsız da ola bilər, çünki Çarmıxa görə müdrik olmaq üçün elmi dərəcələr deyil, yalnız iman lazımdır. “İman edən əbədi həyata malikdir”, – Rəbb günün İncilindəki son cümləsində deyir. Bu, varlığımızın ən mühüm hərəkətidir: ümumiyyətlə Allahın mövcud olduğuna inanmaq deyil, Onun Nazaretli İsanın dili ilə danışdığına inanmaqdır; O isə Özünə heyranlıq deyil, Onun ardınca getməyi istəyir.
