Liturgiya oxunuşları: 30 MART. Müqəddəs bazar ertəsi
BİRİNCİ OXUNUŞ Yeşaya 42,1-7
Budur, Mənim saxladığım, seçdiyim qulum! Könlüm ondan razıdır! Mən Öz Ruhumu onun üzərinə qoymuşam. O, millətlərə ədalət gətirəcək. Çığırmayacaq, səsini qaldırmayacaq, küçələrdə heç kim onun səsini eşitməyəcək. Əzilmiş qamışı qırmayacaq, tüstülənən piltəni söndürməyəcək. O, ədaləti sədaqətlə yayacaq. O, yer üzündə ədaləti quranadək ümidini, cəsarətini itirməyəcək, uzaq diyarlar onun qanununa etibar edəcək. Göyləri yaradıb onları sərən, yeri və onun üzərindəkiləri düzəldən, dünyadakı adamlara nəfəs verən, yer üzündə gəzən insanlara ruh verən Rəbb Allah belə deyir: «Mən Rəbb salehliyimlə səni çağırdım, səni əlindən tutacağam, səni qoruyacağam, səni xalqım üçün əhd edəcəyəm, millətlərə nur edəcəyəm ki, korların gözlərini açasan, zindandan dustaqları, zülmətdə, həbsxanada oturanları azad edəsən.»
Təfsir
Bu müqəddəs günlərdə Rəbbin Qulu obrazı qarşımızda səssiz və əzəmətli şəkildə ucalır, bizi Pasxa sirrinə daxil edir: onun seçilməsi, missiyası və əzabları Məsihin taleyini peyğəmbərcəsinə qabaqcadan göstərir. Allahın Özü Öz Qulunu təqdim edir: Uca Allah onu çətin bir missiya üçün seçmiş və buna görə də onu dəstəkləyir. Peyğəmbərlik Ruhuyla təqdis olunmuş bu Qul bütün xalqlara «ədaləti» (Allahın hökmləri haqqında əməli bilik) gətirəcək. Qul padşah carçısı ilə müqayisə edilərək təsvir olunur. Babil ənənəsində belə carçı şəhər meydanlarında ölüm hökmünü elan edərdi. Əgər dövrə vurduqdan sonra məhkumun müdafiəsi üçün şahid tapılmazdısa, carçı qamışı sındırar və çırağı söndürərdi ki, hökmün qəti olduğunu göstərsin. Lakin həqiqi Padşahın — Allahın Qulu qamışı sındırmır. O, Allahın hökmü ilə gəlsə də, mühakimə etmək üçün deyil, xilas etmək üçün gəlir. İsa həm Əzab çəkən Qul, həm də insanlığı günah əsarətindən azad edən həqiqi Xilaskardır. O, Özü «sındırılmış qamışa» çevrilir və hər kəsi işıqlandıran həqiqi Nur olur.
İNCİL Yəhya 12, 1-11
Pasxadan altı gün əvvəl İsa Bet-Anyaya gəldi. İsanın ölülər arasından diriltdiyi Lazar da orada idi. Orada İsanın şərəfinə ziyafət verdilər. Marta xidmət edirdi. Lazar da İsa ilə birgə süfrə arxasında oturanların arasında idi. Məryəm isə bir litra çox qiymətli xalis nard yağını götürərək İsanın ayaqlarına çəkib onları saçları ilə sildi. Yağın ətri evi bürüdü. Lakin İsanın şagirdlərindən biri, Ona xəyanət edəcək Yəhuda İskaryot dedi: «Nə üçün bu ətir üç yüz dinara satılıb yoxsullara verilmədi?» Bu sözü yoxsulların qayğısına qaldığı üçün deyil, oğru olduğuna görə söylədi, çünki özündə olan pul qutusuna qoyulanların bir hissəsini oğurlayırdı. Onda İsa dedi: «Qadını rahat burax, qoy bunu Mənim dəfn günüm üçün saxlasın. Çünki yoxsullar həmişə sizin yanınızdadır, Mənsə həmişə yanınızda olmayacağam». Yəhudilərdən böyük bir kütlə İsanın orada olduğunu öyrənəndə həm İsaya görə, həm də Onun ölülər arasından diriltdiyi Lazarı görmək üçün oraya gəldi. Onda başçı kahinlər öz aralarında Lazarı da öldürməyi qərara aldılar. Çünki Lazara görə çoxlu Yəhudi gedib İsaya iman edirdi.
Təfsir
Bet-Anyada keçirilən qonağlığın görünməz iştirakçısı ətir olur: nard yağının qoxusu sevinc, təravət və gözəllik hissi bəxş edir. Bu, Lazarın bacısının Rəbbə olan məhəbbətinin əlamətidir. O, İncildə Rəbbin yanına heç nə istəmədən gələn azsaylı şəxslərdən biridir: nə möcüzə, nə söz, nə də izah tələb edir. Məryəm özü üçün bir şey istəmir, əksinə Ona gözlənilməz və zəngin bir hədiyyə gətirir. İsa dərhal onu tərifləyir, çünki məhəbbət öz mahiyyəti etibarilə qarşılıq tələb edir. Rəbb bizə hər şeyi verir: həyatı, günahdan azadlığı, şəfanı və varlığın mənasını, göylərə gedən yolu. Bəs biz Ona nə veririk? Çox vaxt yalnız günahlarımızı və ya nankorluğumuz. O, bu barədə müqəddəs Marqarita Maria Alakok və müqəddəs Faustina Kovalskaya ilə kədər içində danışmışdı. Bet-Anyalı Məryəm isə Məsihə Onu olduğu kimi sevə bilən bir ürəyin səssiz minnətdarlığı ilə cavab verir. Gəlin biz də Rəbbi saf ürəklə sevək və Ona öz «ətirimizlə» dolu sözlərlə müraciət edək. Çünki Allah Məhəbbətdir, həqiqi məhəbbət isə həmişə minnətdar olur.
