Liturgiya oxunuşları: 3 YANVAR. Milad dövrünün şənbəsi
BİRİNCİ OXUNUŞ 1 Yəh 2, 29-3,6
Əgər Onun saleh olduğunu bilirsinizsə, həm də bilin ki, saleh iş görən hər kəs Ondan doğulub. Görün Ata bizə necə məhəbbət göstərib ki, biz Allahın övladları adlanırıq! Doğrudan da, beləyik! Dünya Onu tanımadığına görə bizi də tanımır. Ey sevimlilər, indi biz Allahın övladlarıyıq, amma nə olacağımız hələ üzə çıxmayıb. Lakin bilirik ki, Məsih zühur edəndə biz Ona bənzəyəcəyik, çünki Onu olduğu kimi görəcəyik. Ona bu cür ümid bağlayan hər kəs O pak olduğu kimi özünü pak edir. Günah edən hər kəs Qanunu da pozar, çünki günah Qanunu pozmaqdır. Siz bilirsiniz ki, Məsih günahları aradan qaldırmaq üçün zühur etdi. Onda günah yoxdur. Onda qalan hər kəs günahını davam etdirməz. Günahını davam etdirən hər kəs nə Onu görüb, nə də Onu tanıyır.
Təfsir
Kiminsə övladı olmaq valideynlə eyni təbiəti bölüşmək deməkdir. Hər birimiz kişi və qadından doğulmuşuq və insan təbiətini onlardan almışıq. Vəftiz Ayinini qəbul etməklə, biz Allahın övladları oluruq, yəni ilahi təbiəti alırıq. Bəs biz hər şeyə qadir deyiliksə, təbiət üzərində heç bir gücümüz yoxdursa və üstəlik, xəstələnməyə və ölməyə davam ediriksə, bu necə doğru ola bilər? Cavab budur ki, bu səyahət hələ başa çatmayıb. Bəli, biz Müqəddəs Ruhu alırıq, amma "nə olacağımız hələ üzə çıxmayıb ". Biz hələ də enişli-yoxuşlu yoldayıq, çünki məqsədimizə çatmalıyıq - Məsihdə qalmalı və dünyanın xilasında iştirak etməli, əzablarımızı Xilaskar Məsihin əzabları ilə birləşdirməliyik. Allahın övladı olmağımız bizi sınaqlardan azad etmir, əksinə onları təmizlənmə və ümid və sevgidə daim böyümək üçün bir fürsət kimi yaşamağı öyrədir. Kimsə bu dünyanı böyük bir yetimxana ilə müqayisə edib: deməli, biz xristianların vəzifəsi hər kəsə Atamızın olduğunu deməkdir!
İNCİL Yəh 1, 29-34
Ertəsi gün Yəhya İsanın ona tərəf gəldiyini görüb dedi: «Dünyanın günahını aradan götürən Allah Quzusu budur! “Məndən sonra bir Şəxs gəlir ki, məndən üstündür, çünki məndən əvvəl var idi” deyib haqqında danışdığım Kəs budur. Özüm Onu tanımırdım, amma Onun İsrailə zahir olması üçün mən su ilə vəftiz edərək gəldim». Yəhya şəhadət edib dedi: «Gördüm ki, Ruh göydən göyərçin kimi endi və Onun üzərində qaldı. Özüm Onu tanımırdım, lakin su ilə vəftiz etmək üçün məni göndərənin Özü mənə dedi: “Ruhun kimin üzərinə enib qaldığını görsən, bil ki, Müqəddəs Ruhla vəftiz edən Odur”. Mən də görüb “Allahın Oğlu budur” deyə şəhadət etmişəm».
Təfsir
Məsih gələn kimi Yəhya kənara çəkilir və əsl vəftizi — Əllinci Gün bayramından başlayaraq xalqlara veriləcək qanla vəftizi almaq üçün növbəyə durur. "Aranızda tanımadığınız biri var" (Yəhya 1, 26) ifadəsi bu gün də aktualdır. İsa, şübhəsiz ki, bizimlədir ("Mən həmişə sizinləyəm", Matta 28, 20), amma dünyada çoxmu insan Onu günahları üzərinə götürən kimi tanıyır? Çoxmu insan xilas üçün Ona tərəf dönür? Çoxmu insan Onu sevir? Görünür, İsa bu gün də "böyük qərib" olaraq qalır. Qoy sevgimiz Ona təsəlli versin, tövbəmiz günahkarlara mərhəmət gətirsin, imanımız qəlbləri isidən bir nur olsun və İsaya olan sevgimiz qonşularımızda mərhəməti alovlandırsın! Camaat Rəbbdən Allahın işlərini görmək üçün nə etməli olduqlarını soruşanda, O belə cavab verir " Onun göndərdiyi Şəxsə iman edin" (Yəhya 6, 29).
