Liturgiya oxunuşları: 19 YANVAR. Adi Dövrün II həftəsinin bazar

BİRİNCİ OXUNUŞ 1 Pad (1 Şam) 15,16-23

Şamuel Şaula dedi: «Dayan, bu gecə Rəbbin mənə söylədiklərini sənə deyəcəyəm». Şaul dedi: «Danış». Şamuel dedi: «Sən öz gözündə kiçik olduğun halda İsrail qəbilələrinin başçısı olmadınmı? Rəbb səni İsrail üzərinə padşah olaraq məsh etməyibmi? Rəbb səni yürüşə göndərib dedi: “Günahkarları – Amaleqliləri tamamilə məhv et və qırıb qurtarana qədər onlarla vuruş”. Bəs nə üçün Rəbbin sözünə itaət etmədin, qarətçilik edib talana girişdin və Rəbbin gözündə pis sayılan iş gördün?» Şaul Şamuelə dedi: «Mən Rəbbin sözünə itaət etdim. Rəbbin məni göndərdiyi yürüşə getdim. Amaleq padşahı Aqaqı bura gətirdim, Amaleqliləri isə tamamilə məhv etdim. Lakin xalq talan malından qoyunları və öküzləri, məhv edilməyə həsr olunanlardan ən yaxşısını götürdü ki, Qilqalda Allahın Rəbbə qurban versin». Şamuel isə dedi: «Rəbb Öz sözünə itaət edilməsindən xoşu gəldiyi qədər yandırma qurbanı və başqa qurbanlardan xoşu gələrmi? Bax itaət etmək qurbandan, qulaq asmaq qoçların iç piyindən daha yaxşıdır. Çünki üsyankarlıq falçılığa bərabər günahdır, inadkarlıq isə özbaşınalıq və bütpərəstliyə bərabərdir. İndi ki sən Rəbbin sözünü rədd etdin, O da səni padşahlıqdan rədd etdi».

Təfsir

Padşah Şaul Allahın əmrinə tam şəkildə əməl etməjk istəmədi. Əhdi-Cədiddə də oxşar bir epizod var: Hananya və Sapfira bir tarla satıb gəliri həvarilərə verirlər, lakin gəlirin bir hissəsini özləri üçün saxlayırlar və hər şeyi gətirdiklərini iddia edirlər. Bu yalana görə onlar ölürlər (Həvarilərin İşləri 5, 1-11). Bu iki hadisə ilkin günahı xatırladır, çünki kökü itaətsizlikdir: "Bu ağacdan yeməyin", amma yenə də yeyirlər. Belə günahlarda məsələnin özü çox kiçik, əhəmiyyətsiz görünür (bu gün "kiçik bir günah" adlandıracağımız əməllər), lakin nəticələri fəlakətlidir. Allaha itaət etmək, Onun göstərişlərini, hətta bizə qəribə görünsə belə, məhəbbətlə qəbul etmək ən gözəl əməldir. Axı itaət bizi azad edir, bizi Allahın övladları edir, bizi həqiqətə qərq edir və imanlı insana əsl xoşbəxtlik bəxş edir.

İNCİL Mark 2,18-22

Yəhyanın şagirdləri və fariseylər oruc tuturdular. Bəzi adamlar İsanın yanına gəlib soruşdular: «Nə üçün Yəhyanın şagirdləri və fariseylərin şagirdləri oruc tutur, amma Sənin şagirdlərin oruc tutmur?» İsa onlara cavab verdi: «Bəy yanlarında olanda sağdışı və soldışı oruc tutarmı? Nə qədər ki bəy onların yanındadır, onlar oruc tutmazlar. Lakin bəyin onların arasından aparılacağı günlər gələcək və o zaman oruc tutacaqlar. Heç kim köhnə paltara təzə parçadan yamaq vurmaz. Yoxsa təzə yamaq köhnə paltardan qopar və yırtıq daha pis olar. Heç kim təzə şərabı köhnə tuluqlara doldurmaz. Yoxsa şərab tuluqları partladar, həm şərab, həm də tuluqlar zay olar. Təzə şərab təzə tuluqlara doldurulmalıdır».

Təfsir 

Bu mətn imanın ən sevincli sirlərindən birini açır: Məsihin varlığı həyatı bayrama çevirir, hətta zahirən dünyəvi əzabların yükünü daşımağa davam etsək belə. Oruc tövbə təcrübəsidir, tövbə isə həmişə günahla bağlıdır. Biz, günahları kəffarə etmək və ya hisslərimizi cilovlamaq üçün oruc tuturuq. Fariseylərə cavabında Rəbb günahın artıq mövcud olmadığı (və buna görə də tövbəyə ehtiyac olmadığı) bir dünyaya, bir reallığa, Səmavi Padşahlığa işarə edir. Əlbəttə ki, Cənnətdə artıq tövbə olmayacaq. Lakin Rəbb həmsöhbətlərinə deyir: Cənnət artıq buradadır, qarşınızdadır. O, Mənəm! Buna görə də "bəyin sağdışıları və soldışıları" (həvarilər) oruc tutmurlar: onlar Bəylə birlikdə bayram edirlər. Buna görə də yeni şərabı saxlamaq üçün yeni şərab tuluqlarına ehtiyac var (köhnə və çatlamış şərab tuluqları sadəcə cırılacaq); yeni paltarlara o zaman ehtiyac yaranır ki, köhnələri artıq təmir etmək mümkün deyil. İsa bu metaforalardan istifadə edərək Müqəddəs Ruhda açmaq üçün gəldiyi yeni bir dövrdən - Cənnətdə əbədi səadət dövründən danışır. Lakin insanlar zəif olduqları və tez-tez günaha batdıqları üçün, yer üzündə yaşadığımız müddətcə tövbə zəruri olaraq qalır. Lakin indi bu, yeni bir məna kəsb edir: tövbə içimizdəki "köhnə insanı" susdurmağa və dirilmiş Məsihin Pasxa nurunun həyatımızda parlamasına imkan verir.