Liturgiya oxunuşları: 18 YANVAR. Adi Dövrün II Rəbb günü
BİRİNCİ OXUNUŞ Yeşaya 49,3.5-6
Mənə dedi: «Qulumsan, ey İsrail, Mən səninlə izzətlənəcəyəm».Rəbb məni qulu etmək üçün ana bətnində mənə quruluş verdi ki, Yaqub nəslini Ona tərəf döndərim, İsraili Onun önünə toplayım. Onun gözündə hörmət qazandım, qüdrətim Allahım oldu. Rəbb indi belə deyir. O deyir: «Yaqub qəbilələrinin bərpası, İsrailin sağ qalanlarının geri qayıtması üçün qulum olmağın kifayət deyil. Səni millətlərə nur edəcəyəm ki, xilasım dünyanın ən uzaq yerlərinə yayılsın».
Təfsir
Yeşayanın təsvir etdiyi Qul obrazı açıq şəkildə İsa Məsihə işarə edir. Lakin Rəbbin missiyası sadəcə Yaqub qəbilələrini yenidən birləşdirmək və İsraili çiçəklənən və güclü bir millətə çevirmək deyil. O, bütün dövrlərin insanlarını Özünə cəlb etmək və onları Adəmlə Həvvanın yaradıldığı ilkin halında "bərpa etmək" üçün çağırılıb. Eden bağındakı əcdadlarımız yəhudi deyildilər, çünki İsrail hələ mövcud deyildi və biz diqqətimizi məhz bu ilkin obraza yönəltməliyik. Biz sadəcə Adəmlə Həvvanın ilkin halına qayıtmırıq: Allah-İnsanın gəlişi, Onun qurbanı, dirilməsi və göyə qalxması vasitəsilə Uca Allah bəşəriyyətə Özü ilə ünsiyyətdə yaşamaq və hətta - bundan da çox - Onun ilahi təbiətinin şəriki olmaq qabiliyyətini bəxş etdi (2 Peter 1, 4). Yeşayanın bəhs etdiyi xilas qazanılacaq "diplom", dinclik içində istirahət etmək üçün məkan və ya yalnız firavan və sağlam bir həyata zəmanət deyil. Xilas "nəsə" deyil, "Kimsə"dir və bu Şəxslə münasibət qurmaq vacibdir. Biz yalnız "Məsihdə" qaldıqda xilas oluruq, Müqəddəs Paul bu ifadəni məktublarında bir neçə dəfə istifadə edir.
İKİNCİ OXUNUŞ 1 Kor 1,1-3
Allahın iradəsi ilə Məsih İsanın həvarisi olmağa çağırılmış mən Pauldan və qardaşımız Sostendən Allahın Korinfdə olan imanlılar cəmiyyətinə salam! Siz Məsih İsada təqdis olunmusunuz. Rəbbimiz İsa Məsihin adını hər yerdə çağıran hamı ilə birlikdə müqəddəs olmağa çağırılmısınız. O həm onların, həm də bizim Rəbbimizdir. Atamız Allahdan və Rəbb İsa Məsihdən sizə lütf və sülh olsun!
Təfsir
Paul sevimli icmasına uzun bir məktub yazır (o, bu şəhərdə iki il yaşamışdı və oradakı hər kəsi tanıyırdı). O, qardaşlarını salamlayaraq, iki vacib şeyi çatdırır: birincisi, Allahın iradəsi ilə həvari olduğunu; ikincisi, Korinflilərin müqəddəsliyə çağırıldıqlarını. Özünü Allahın iradəsi ilə həvari elan edərək, Paul dərhal səlahiyyətinin haradan qaynaqlandığını aydınlaşdırır: onun məktub yazmağının niyyəti əhəmiyyətsiz hekayələr danışmaq və ya şəxsi fikirlərini bölüşmək deyil, birbaşa Allahın iradəsini çatdırmaqdır. Vəftiz olunmuş və müqəddəslik ruhunu qəbul etmiş Korinflilər, artıq aldıqları ruhani nemətləri həyatlarında daha dolğun şəkildə təcəssüm etdirmək üçün Paulun sözünü qəbul etməlidirlər. İlk icmaların insani və mənəvi inkişafı dövründə hər kəsin güclü bir ideya ətrafında, mütləqlik xarakterinə malik həyati bir həqiqət ətrafında birləşmələri lazım idi. Lakin bu, bütün dövrlərin Kilsəsi üçün doğrudur: biz Kilsəyik, çünki biz Məsihin Bədəniyik və Kilsədə danışan hər kəs bunu Məsihin səlahiyyəti ilə etməlidir. Biz itaət edirik, çünki biz Onun xalqıyıq.
İNCİL Yəhya 1,29-34
Ertəsi gün Yəhya İsanın ona tərəf gəldiyini görüb dedi: «Dünyanın günahını aradan götürən Allah Quzusu budur! “Məndən sonra bir Şəxs gəlir ki, məndən üstündür, çünki məndən əvvəl var idi” deyib haqqında danışdığım Kəs budur. Özüm Onu tanımırdım, amma Onun İsrailə zahir olması üçün mən su ilə vəftiz edərək gəldim». Yəhya şəhadət edib dedi: «Gördüm ki, Ruh göydən göyərçin kimi endi və Onun üzərində qaldı. Özüm Onu tanımırdım, lakin su ilə vəftiz etmək üçün məni göndərənin Özü mənə dedi: “Ruhun kimin üzərinə enib qaldığını görsən, bil ki, Müqəddəs Ruhla vəftiz edən Odur”. Mən də görüb “Allahın Oğlu budur” deyə şəhadət etmişəm».
Təfsir
Yəhyanın bəyanatı möhtəşəmdir: "Dünyanın günahını aradan götürən Allah Quzusu budur!" Bu ifadə bütün diqqəti Məsihə cəlb etməli idi, çünki insan üçün günahdan qurtuluşdan daha vacib bir şey yoxdur. Bəs niyə bu xəbər bütün dünyaya ən qısa müddətdə yayılmadı? Niyə izdiham özlərini Onun ayaqlarına atıb onları pislikdən xilas etməsini yalvarmadı? Çünki İsa, hər şeydən əvvəl, könüllü olaraq qəbul edilməsini istəyir və hər bir insanla şəxsi dostluq və sevgi münasibətləri qurmağa çalışır. Əgər O, buludun üzərində oturarkən, "sehrli çubuq vasitəsilə" günahlardan azad etsəydi, bu, sevgi olmazdı. Vəftiz səhnəsi peyğəmbərcə Çarmııxa işarə edir: Allah bizi pislikdən azad etmək və Onun ilahi həyatında iştirak etmək üçün təsvirolunmaz əzab çəkir. Və yenə də, hətta bu anda belə, ilahilik eyni zamanda özünü aşkar edir və gizlədir. Çarmıxa çəkilmiş, ölən insanda Allahın Oğlunu kim tanıya bilər? Yalnız sevən, yalnız inanan. Vəftizçi elan edir, vəftiz edir və səhnəni tərk edir. O, bizə əminliklə dedi ki, İsa Allahın Oğludur və indi bizim növbəmizdir ki, iman edək və Müqəddəs Ruh vasitəsilə Xilaskarla dərin, şəxsi ünsiyyətə girək.
