Liturgiya oxunuşları: 29 DEKABR. Milad oktavasının 5-ci günü
BİRİNCİ OXUNUŞ 1 Yəh 2,3-11
Onu tanıdığımızı bundan bilirik ki, Onun əmrlərinə riayət edirik. Kim «Onu tanıyıram» deyir, amma Onun əmrlərinə riayət etmirsə, yalançıdır və onun daxilində həqiqət yoxdur. Lakin kim Onun sözünə riayət edirsə, Allah məhəbbəti onda, həqiqətən, kamilliyə çatıb. Bundan bilirik ki, biz Allahdayıq. Kim Onda qaldığını deyirsə, İsa Məsihin həyat sürdüyü kimi həyat sürməlidir. Sevimlilər, sizə yeni əmr yazmıram, əvvəldən bəri malik olduğunuz qədim bir əmri yazıram; qədim əmr isə eşitdiyiniz sözdür. Yenə də sizə yeni bir əmr yazıram; bunun həqiqi olduğu Məsihdə və sizdə görünür. Çünki qaranlıq keçir və həqiqi nur artıq parlayır. Kim nurda olduğunu deyir, amma qardaşına nifrət edirsə, hələ də qaranlıqdadır. Qardaşını sevən nurda qalır və onda büdrəmə səbəbi yoxdur. Amma qardaşına nifrət edən qaranlıqdadır. O, qaranlıqda gəzir və hara getdiyini bilmir, çünki qaranlıq onun gözlərini kor edib.
Təfsir
Sevginin öz qaydaları var və o, mütləq bir nizamdır; eyni zamanda, o, şəxsi azadlığa əsaslanır, çünki insan məcburi şəkildə sevə bilməz. Sevginin qaydaları hansılardır? Müqəddəs Paul onları Korinflilərə yazdığı Birinci Məktubun 13-cü fəslində təsvir edir, lakin onları bir cümlə ilə ümumiləşdirmək olar: İsanın öyrətdiyi hər şeyə əməl etmək. Və ya daha qısası: İsanı sevmək. Gəlin bu sözlərə diqqət yetirməyə çalışaq: İsanı sevmək. Əgər biz Onu həqiqətən seviriksə, onda Onu məmnun edəcək şeyləri sadə şəkildə və inamla edirik. Buna görə də Yəhyanın bütün Məktubu iki anlayışa əsaslanır: bilik və sevgi. Sevmək üçün mən bilməliyəm və bilmək üçün də sevməliyəm. Nəticədə, gündəlik həyatda təlimatlar və risalələrə artıq ehtiyac yoxdur: əgər Məsihin Ruhu bizdə yaşayırsa, İsanın İncildə əmr etdiyi hər şeyi yerinə yetirmək üçün həm istəyimiz, həm də gücümüz olacaq. Biz bunu asanlıqla, sevinclə edəcəyik və həyatımız yenilənəcək. Ata Divo Barsotti yazır: “Günah bölür...lənətlilərin birliyi yoxdur. Cəhənnəm tənhalıq və boşluqdur.” Müqəddəs Müjdəçi Yəhya deyir ki, qardaşa nifrət bizi qaranlığa sürükləyir, halbuki Allah nurdur.
İNCİL Luka 2,22-35
Musanın Qanununa görə paklanma dövrü tamamlanandan sonra Yusiflə Məryəm Körpəni Rəbbə həsr etmək üçün Yerusəlimə gətirdilər, necə ki Rəbbin Qanununda yazılıb: «Bətndən ilk doğulan bütün oğlanlar Rəbb üçün müqəddəs sayılsın». Həmçinin onlar qurban təqdim etdilər, necə ki Rəbbin Qanununda əmr olunub: «İki qumru quşu yaxud iki göyərçin balası». O vaxt Yerusəlimdə Şimeon adlı bir adam var idi. O, saleh və mömin idi. İsrailə təsəlli veriləcəyini gözləyirdi və Müqəddəs Ruh onun üzərində idi. Müqəddəs Ruh ona əvvəlcədən açıqlamışdı ki, o, Rəbbin Məsihini görməyincə ölməyəcək. Beləliklə, Şimeon Ruhdan ilham alıb məbədə gəldi. Körpənin ata-anası Qanunda qoyulan adətə əməl etmək üçün Körpə İsanı məbədə gətirəndə Şimeon Körpəni qucağına götürdü və Allaha alqış edərək belə dedi: «Ey Pərvərdigar, indi Sənin sözünə görə mən – Sənin qulun arxayın ölə bilərəm. Çünki bütün xalqların gözləri önündə hazırladığın xilası, millətlərə aşkar edən nuru, xalqın İsrail üçün də izzəti öz gözlərimlə gördüm». Körpənin ata-anası Onun barəsində deyilən sözlərə görə heyrətə gəldi. Şimeon onlara xeyir-dua verib Körpənin anası Məryəmə belə dedi: «Bu Körpə İsraildə bir çox adamın yıxılmasının ya ucalmasının səbəbkarı və insanların rədd etdiyi bir əlamət olmaq üçün təyin olunub. Sənin köksünə isə sanki qılınc saplanacaq. Bütün bunlar bir çoxlarının qəlbindəki fikirlərin aşkara çıxması üçün olacaq».
Təfsir
Lukanın İncilində qəfildən peyda olan və eyni tərzdə, birdən-birə yoxa çıxan sirli və naməlum Şimeon deyir ki, Körpəni qucağına aldıqda "xilas gördü". O, cəmi bir neçə həftəlik körpədə nə görə bilərdi? Hansı xilası? Roma əsgərlərindənmi, borclardanmı, həyatın çətinliklərindənmi? Xeyr: ölümdən. Bu Körpə adi körpə deyil, o tam başqadır. Məryəmdən təsvirolunmaz şəkildə doğulmuş O, çarmıxda edam edildikdən sonra Özü həyata qayıdacaq və görünməz olsa da, əbədi olaraq yer üzündə qalacaq. Şimeon adi bir uşağı görüb Onun gələcək dirilməsini seyr edirdi; biz görmürük, amma imanla bilirik ki, xilas məhz bu Körpədən gəlir. Burada ilk dəfə xalqdan bir adam Xilaskar İsa haqqında danışır: o, xoş xəbəri gətirən mələk Cəbrayıl deyil, körpəsinin bətnində hərəkət etməsini hiss edən qohum Elizavet deyil, və ya yuxu görən müqəddəs Yusif deyil. Şimeon, hamımızın onda özümüzü tanıya biləcəyimiz sirli, tənha bir insandır. O, İsanın doğulması ilə dünyaya gələn xilası ilk dəfə tərənnüm edəndir. İndi o, rahat ölə bilər, çünki o, artıq hər şeyi görüb.
