Liturgiya oxunuşları: 12 OKTYABR. Adi Dövrün XXVIII RƏBB GÜNÜ
BİRİNCİ OXUNUŞ 2 Pad 5, 14-17
Bundan sonra Naaman Allah adamının sözünə görə İordan çayına enib yeddi dəfə suya baş vurdu. Onun bədəni sağaldı və körpə bədəni kimi tər-təmiz oldu. Naaman bütün dəstəsi ilə yenə Allah adamının yanına gəldi və onun önündə dayanıb dedi: «Bax indi bildim ki, İsraildən başqa, dünyanın heç bir yerində Allah yoxdur. Buyur bu qulunun hədiyyəsini götür». Lakin Elişa dedi: «Önündə durduğum var olan Rəbbə and olsun ki, heç nə götürməyəcəyəm». Naaman götürməyi təkid etdi, ancaq Elişa istəmədi. Naaman dedi: «Əgər götürmürsənsə, onda qoy bu quluna buradan iki qatır yükü torpaq verilsin. Çünki bu qulun artıq başqa allahlara deyil, yalnız Rəbbə yandırma qurbanları və təqdimlər gətirəcək.
Təfsir
Bu oxunuş Suriyalı sərkərdə və bütpərəst Naamanın Allah adamı,peyğəmbər Elişanı ziyarət etməsindən bəhs edir. Bu görüş və itaəti sayəsində Naaman cüzamdan sağaldı və həqiqi Allaha iman gətirdi. Mətni üç mərhələyə bölmək olar: birincisi, xəstəlik iman gətirər. Ciddi xəstəlik bütpərəst Naamanı Haqq-Taalanın peyğəmbərindən kömək istəməyə məcbur edir. İkincisi, şübhə və itaət. Naaman əvvəlcə Elişanın İordan çayının sularına yeddi dəfə daxil olmaq məsləhətindən qəzəblənir. Ancaq qürurunu bir kənara qoyan suriyalı itaət edir və tamamilə sağalır. Üçüncüsü, minnətdarlıq və iman gətirmə: fiziki şəfa mənəvi şəfaya aparır. Naaman peyğəmbərin yanına qayıdır və etiraf edir: “Bax indi bildim ki, İsraildən başqa, dünyanın heç bir yerində Allah yoxdur.”. Naaman cüzamına görə “ölü” idi, amma “dirildi”. Onun sağalması Allahın qüdrətinin təzahürü idi.
İKİNCİ OXUNUŞ 2 Tim 2, 8-13
Yaydığım Müjdədə açıqlandığı kimi, Davudun nəslindən olub ölülər arasından dirilən İsa Məsihi yadında saxla. Bu Müjdə naminə zəncirə vurulmuş bir cinayətkar kimi əzaba qatlaşıram. Amma Allahın kəlamı zəncirlənməmişdir. Bu səbəbdən seçilmişlərə görə, onlar da Məsih İsada olan xilasa əbədi izzətlə bərabər nail olsunlar deyə hər şeyə dözürəm. Bu söz etibarlıdır ki, «Əgər Onunla öldüksə, Onunla da yaşayacağıq; Əgər dözəriksə, Onunla da birlikdə padşahlıq edəcəyik. Əgər Onu inkar etsək, O da bizi inkar edəcək. Biz sadiq qalmasaq da, O sadiq qalacaq. Çünki Öz təbiətinə zidd davrana bilməz».
Təfsir
İsaya iman passivlik deyil, inadkarlıq tələb edir. Həvari Timoteyə dirilmiş Məsihi xatırladaraq, imanında möhkəm qalmağa təşviq edir. Paul öz şagirdinə yazır: “Davudun nəslindən olub ölülər arasından dirilən İsa Məsihi yadında saxla. Bu Müjdə naminə zəncirə vurulmuş bir cinayətkar kimi əzaba qatlaşıram”. Paul Müjdə naminə əzablara dözür, lakin bilir ki, bu çətinliklər xilasa aparır. O vurğulayır ki, bədəni zəncirlənmiş olsa da, “Allahın kəlamı zəncirlənməmişdir”. Bu o deməkdir ki, heç bir vəziyyət Müjdənin yayılmasına mane ola bilməz. Biz xəyanət etsək də, İsa həmişə sadiq qalır. Bu bizim ümidimizdir. İman və ona şəhadət etmək ciddi məsələlərdir ki, bu da gərginliyə, bizim tərəfimizdən çətinliklərə və başqalarının laqeydliyinə səbəb ola bilər. İmanda möhkəm qalmaq üçün insan tez-tez Müqəddəs Yazıları dinləməli, Kilsənin təlimlərinə qulaq asmalı və səmimi dua etməlidir. Problemlər və çətinliklər olub, var və olacaq, lakin Rəbb İsa həmişə yaxındır.
İNCİL Luka 17, 11-19
İsa Yerusəlimə doğru yolunu davam edərkən Samariya ilə Qalileya arasındakı sərhəddən keçirdi. Kəndlərin birinə girəndə Onu on nəfər cüzamlı kişi qarşıladı. Onlar uzaqda durub ucadan çığırdılar: «İsa, Ustad, bizə rəhm et!» İsa onları görüb «gedin, özünüzü kahinlərə göstərin» dedi. Onlar yol gedə-gedə pak oldular. Onlardan biri isə sağaldığını görəndə uca səslə Allahı izzətləndirərək qayıtdı. O üzüstə İsanın ayaqlarına düşərək Ona təşəkkür etdi. Bu adam Samariyalı idi. Onda İsa dedi: «Pak olanlar on nəfər deyildimi? Bəs qalan doqquz adam haradadır? Bu yadellidən savayı geri dönüb Allaha izzət verən olmadımı?» Sonra o adama dedi: «Ayağa qalx, get. İmanın səni xilas etdi».
Təfsir
İsa Yerusəlimə doğru gedərkən onu on cüzamlı qarşıladı. Qanuna uyğun olaraq, onlar məsafəni saxlayıb ümidsiz halda qışqırdılar: "İsa, Ustad! Bizə rəhm et!" İsa onlara deyir: « gedin, özünüzü kahinlərə göstərin ». O vaxt insanlar adətən sağaldıqdan sonra kahinlərin yanına gedirdilər: kahinlər xəstələrin sağaldıqlarını rəsmi təsdiq edirdilər və sağalanlar cəmiyyətə qayıdırdılar. Lakin İsa onları hələ xəstə ikən yola salır və onlar “yolda” sağalırlar. Onlardan biri sağaldığını görüb geri döndü və uca səslə Allahı izzətləndirdi. O, samariyalı idi. İsa soruşur: " Pak olanlar on nəfər deyildimi? Bəs qalan doqquz adam haradadır? " O, samariyalıya deyir: « Ayağa qalx, get. İmanın səni xilas etdi ». On cüzamlıdan doqquzu təmizləndi (fiziki cəhətdən sağaldı) və yalnız biri öz imanı sayəsində xilas oldu və təkcə fiziki deyil, həm də mənəvi şəfa aldı. Onun minnətdarlığı qurtuluş yolu oldu. Dua təkcə istək deyil, həm də şükürdür. Yalnız şükür etməyi bilənlər Allahı həqiqətən tanıyır və şəfadan daha çoxunu alırlar.
