Liturgiya oxunuşları: 25 SENTYABR. Adi Dövrün XXV həftəsinin cümə axşamı
BİRİNCİ OXUNUŞ Haq 1,1-8
Padşah Daranın hakimiyyətinin ikinci ili, altıncı ayın birində Yəhuda valisi Şealtiel oğlu Zerubbabilə və baş kahin Yehosadaq oğlu Yeşuaya peyğəmbər Haqqay vasitəsilə Rəbbin bu sözü nazil oldu: «Ordular Rəbbi belə deyir: “Bu xalq deyir ki, hələ Rəbbin məbədini qurmaq vaxtı çatmayıb”». Rəbbin bu sözü peyğəmbər Haqqay vasitəsilə nazil oldu: «Bu məbəd xaraba qaldığı halda sizin üçün damı yaraşıqlı evlərinizdə oturmaq vaxtıdırmı?» İndi isə Ordular Rəbbi belə deyir: «Həyat yollarınız haqqında yaxşı düşünün. Çox əkdiniz, amma az götürdünüz. Yeyirsiniz, amma doymursunuz. İçirsiniz, amma susuzluğunuz yatmır. Geyinirsiniz, amma geyiminiz sizi isitmir. Məvacibiniz cırıq kisəyə qoyulur». Ordular Rəbbi belə deyir: «Həyat yollarınız haqqında yaxşı düşünün. İndi dağlara çıxıb ağac gətirin və məbədi qurun. Onda razı qalaram, izzətlənərəm». Bunu deyən Rəbdir.
Təfsir
Bu parçada peyğəmbər Haqqay Babil əsarətindən qayıtdıqdan sonra İsrail xalqına müraciət edir. Xalqın geri qayıtdığına görə yaşadığı ilkin ruh yüksəkliyi artıq sönüb. Onlar şəxsi işlərlə məşğul olmağa başladılar: evlərini tikir və təmin edir, lakin Rəbbin məbədinin bərpasına laqeyd yanaşırlar. Oxunuş bu ziddiyyəti vurğulayır: “bu məbəd xaraba qaldığı halda” insanlar “yaraşıqlı evlərində” yaşayır. "Həyat yollarınız haqqında yaxşı düşünün " deyə Haqqay nəsihət edir və həmyerlilərini davranışları barədə düşünməyə çağırır. Peyğəmbər qeyd edir ki, onların həyatlarında baş verən problemlər və uğursuzluqlar onların öz mənfəətlərini Allahdan üstün tutmalarının birbaşa nəticəsidir. İnsan Allahdan uzaqlaşdıqda həyatı nizamını itirir. Haqqay məzəmmətlə yanaşı, ruhlandırır və çağırır: “İndi dağlara çıxıb ağac gətirin və məbədi qurun”. Bu, sadəcə bir əmr deyil, Allahla əməkdaşlığa çağırışdır. Məbədin yenidən qurulması təkcə fiziki deyil, həm də imana qayıdış və Allahın həyatda üstünlüyünü simvolizə edən mənəvi bir hərəkətdir. İsrailin bütün səhvlərinə baxmayaraq, Allah Öz xalqından üz döndərmədi. İnsanlar yollarını azanda belə, Rəbb bağışlamağa və hidayət etməyə hazırdır. Allah ən böyük səhvlərimizi belə düzəldə bilər və Ona döndüyümüz halda, onlardan xeyirimiz üçün istifadə edə bilər.
İNCİL Luka 9,7-9
Hökmdar Hirod baş verən bütün hadisələr barədə eşitdi və çaşıb-qaldı. Çünki bəziləri «Yəhya ölülər arasından dirilib», digərləri «İlyas zühur edib», başqaları da «qədim peyğəmbərlərdən biri dirilib» deyirdi. Hirod isə dedi: «Yəhyanın boynunu mən vurdurdum, bəs haqqında bu xəbərləri eşitdiyim Adam kimdir?» Hirod Onu görməyə can atırdı.
Təfsir
Padşah Hirod İsanın əməlləri haqda eşidir və Onu görmək istəyir. O, hesab edir ki, İsanı dinləmək və görmək Onun kim olduğunu tam başa düşmək üçün kifayətdir. Lakin, həqiqi daxili dəyişiklik olmadan bu yanaşma adi bir insanla qarşılaşmadan başqa bir şeyə səbəb olmayacaqdır. Məsih haqqında sadəcə eşitmək həyatı dəyişdirmək üçün kifayət deyil. Həqiqi diqqət insanın bütövlüklə cəlb olmasını və Allahın iradəsini yerinə yetirməyə hazır olmasını tələb edir. Hirod qəddar ürəkli bir insan olsa da, onun İsaya olan marağı onu göstərir ki, hətta belə bir ürəkdə də Allaha doğru istək yarana bilər. Allah istəyi hər bir insanın qəlbinin qapısını döyür. Hirodun hekayəsi bizi vacib bir sual verməyə sövq edir: "Mənim üçün, bizim üçün İsa kimdir?" Məsih haqqında qavrayışımız ya səthi ola bilər (Hirodunki kimi), ya da dərin, imana köklənmiş. Məsihlə həqiqi görüş səmimi iman və qonşularımıza qarşı mərhəmət vasitəsilə baş verir.
